• Әхбаратлар еқими
• 03 Наурыз, 2021

Есил қәдрийәтләр

Қазақстан Җумһурийитиниң дөләт кативи Қырымбек Көшербаев Мустәқилликниң 30 жиллиғиға вә Миннәтдарлиқ күниниң тәсис қилинғиниға бәш жил толушиға беғишланған «дүгләк үстәл» мәҗлисигә қатнашти.
Қазақстан хәлқи Ассамблеяси уюштурған чарә-тәдбиргә әхбарат вә җәмийәтлик тәрәққият министри Аида Балаева, ҚХА Рәисиниң орунбасарлири Майя Бекбаева вә Закирҗан Кузиев, ҚХАдин сайланған Парламент Мәҗлисиниң депутатлири, вилайәтләр, Нур-Султан, Алмута һәм Чимкәнт шәһәрлири һакимлириниң орунбасарлири, ҚХА әзалири, ҚХА этномәдәнийәт бирләшмилири вә яшлар қанитиниң вәкиллири қатнашти.
Мәҗлис давамида униңға қатнашқучилар Қазақстан қәдрийәтлирини –хәлиқ бирлиги вә разимәнлигини, иҗтимаий пикирдашлиқ вә өзара ярдәмни, достлуқ әнъәнилириниң йеңи әвлатларға тапшурулушини әкис әттүридиған Мустәқилликниң 30 жиллиғиниң вә Тунҗа Президент – Елбасы тәсис қилған Миннәтдарлиқ күниниң җипсилаштурғучи әһмийәткә егә екәнлигини тәкитлиди.
Дөләт кативи Қырымбек Көшербаев чарә-тәдбирни ечип, бизниң бийил Мустәқилликниң 30 жиллиғини нишанлиғач, Миннәтдарлиқ күнигә алаһидә әһмийәт бериватқанлиғимизни вә мустәқил Қазақстанниң асасини салғучиларға чоң тәшәккүр изһар қилидиғанлиғимизни тәкитлиди.
– Биринчи новәттә биз әҗдатлиримизниң әркинлик вә суверенитет тоғрилиқ көп әсирлик арминини рояпқа чиқарған Тунҗа Президент – Елбасы Нурсултан Әбишоғли Назарбаевтин чоңқур миннәтдар болушимиз керәк, –деди Қырымбек Көшербаев.
Дөләт кативи шундақла заман синақлириға маслашқан сүпәт җәһәттин йеңи миллий кимлик шәкиллиниватқан һазирқи шараитта Дөләт рәһбири Қасым-Жомарт Тоқаевниң иҗтимаий-ихтисадий ислаһатлар билән бирқатарда җәмийәт аң-сәвийәсини йеңилашқиму чоң диққәт бөлүватқанлиғини тәкитлиди.
Мәсилән, сәясий тәқипләшләр қурванлирини толуқ ақлаш бойичә миқияслиқ ишниң аяқлишиши җәмийитимизни роһий йеңилашниң муһим йөнилиши болуши керәк. Тоталитаризмдин зәрдап чәккән көплигән хәлиқләр үчүн қазақ йери һәқиқий өйигә айланди. Тарихий һәққанийәтни әслигә кәлтүрүш, бегуна сотланғанларниң адил исмини тикләш – биз мана мошуларни миннәтдар әвлатлиримиз хатирисидә қалдурушимиз керәк.
Ачарчилиқниң паҗиәлик ақивәтлири, «Алаш» рәһбәрлириниң, нурғунлиған һәқиқий вәтәнпәрвәрләрниң тәғдири, хәлқимиз тарихини сахтилаштуруш урунушлириму шу җүмлидиндур.
Дөләт кативи сөзиниң ахирида қазақстанлиқларға һәрбиримизниң бәхит-саадити, елимизниң гүллиниши йолида сиңириватқан әҗри үчүн миннәтдарлиқ билдүрди.
Мәҗлис даирисидә шундақла ҚХАниң «Тунҗа Президентниң 30 жил течлиқ вә разимәнлик йоли билән» лайиһиси вә «Шәпқәтлик карвини: 30 изгү иш» хәйрихаһлиқ марафони тонуштурулди. 
 Учришишта билим бериш вә саламәтликни сақлаш саһалириниң, гражданлиқ җәмийәт, студентлар вә этномәдәнийәт бирләшмилириниң вәкиллири сөзгә чиқти.
Мәлумки, Миннәтдарлиқ күнини мәйрәмләш идеясини дәсләпки қетим Нурсултан Назарбаев 2015-жили апрельда Қазақстан хәлқи Ассамблеясиниң XXII сессиясидә оттуриға қойған еди. Шу чағда Тунҗа Президент – Елбасы һазирқи Қазақстанда яшаватқан этник топларниң умумий тарихий тәғдириниң хәлиқниң менталитетиға, униң һаятий тәсәввурлириға вә интилишлириға иҗабий тәсир қилғанлиғини, барлиқ милләтләр үчүн умумий қәдрийәт вә идеалларни шәкилләндүргәнлигини тәкитлигән еди. Елбасы Қазақстанниң көпмилләтлик хәлқиниң шәкиллиниш тарихини ечип, мундақ тәклипни оттуриға қойиду:
«Қазақстан хәлқи Ассамблеяси қурулған күнни – 1-мартни – һәр жили Барлиқ милләтләрниң бир-биригә вә шәпқәтлик көрситип, мошу адәмләрни уруқ-туққанлири сүпитидә қобул қилған қазақларға миннәтдарлиқ күни сүпитидә нишанлаш адаләтлик болар еди. Бу бизни техиму йеқинлаштуратти. Бу күн шәпқәтликниң, достлуқ вә барлиқ қазақстанлиқларниң бир-биригә муһәббитини изһар қилиш күни болар еди». 
Миннәтдарлиқ күни Қазақстан Җумһурийитиниң 2016-жил 14-январьдики Пәрмани билән рәсмий тәсис қилинди вә шу жили тунҗа қетим атап өтүлди.