• Әхбаратлар еқими
• 03 Наурыз, 2021

ҚХА аллеяси бәрпа қилинди

Миннәтдарлиқ күни Һөкүмәт қарари билән елимизниң мәйрәмләр тизимиға киргүзүлгән. Уни нишанлашниң асасий мәхсити – җәмийитимизниң җиплишишини намайиш қилиш, җәмийәтлик разимәнликни, гражданлиқ течлиқни, қазақстанлиқ бирпүтүнлүкни вә бирликни көрситиштин ибарәт. Мошу мәхсәттә мәзкүр мәйрәм һарписида  Алмута шәһиридики җумһурийәтлик миллий мәдәнийәт мәркәзләрниң рәһбәрлири атақлиқ язғучи, академик Сәбит Муқанов намидики скверда Қазақстан хәлқи Ассамблеяси аллеясини бәрпа қилишни қолға алди. Мәзкүр чарә-тәдбир Қазақстан Җумһурийити Парламенти Мәҗлисиниң депутати Абилфас Хамедов вә «Әзәрбәйҗанлар ассоциацияси» җумһурийәтлик җәмийәтлик бирләшмисиниң әзалири, шундақла этномәдәнийәт мәркәзлири рәһбәрлириниң тәшаббуси, Алмута шәһиридики Достлуқ өйи паалийитини тәминләйдиған «Қоғамдық келісім» бирләшмиси билән Т. Жүргенов намидики Қазақ миллий сәнъәт академиясиниң уюштуруши билән әмәлгә ашурулди.
 Дәсләп сөз новитини алған депутат Абилфас Хамедов Миннәтдарлиқ күниниң Қазақстанниң Тунҗа Президенти тәрипидин алға сүрүлгән мәйрәм екәнлигини тәкитлиди. Кейинки натиқ «Вайнах» Қазақстан чеченлири вә ингушлири ассоциациясиниң рәиси А.Мурадов өз нутқида чечен хәлқиниң йәр авдурушниң һәммә зәрдавини чоңқур һис қилидиғанлиғини ейтип, меһмандостлуғи, меһриванлиғи, мәртлиги үчүн Қазақ елигә, қазақ хәлқигә чәксиз миннәтдарлиқ билдүрди. Т.Жүргенов намидики Қазақ миллий сәнъәт академиясиниң профессори, ҚХА илмий-экспертлар топиниң әзаси М.Шаймерденоваму жиғилғанларға өзиниң иллиқ һәм сәмимий тиләклирини изһар қилди. 
Мәлумки, Қазақ миллий сәнъәт академияси узун жиллардин буян җумһурийәтлик мәдәнийәт мәркәзлири билән һәмкарлиқта ишләп келиватиду. Академия оқутқучилири билән студентлар ҚХА өткүзидиған һәрқандақ чарә-тәдбирләргә паал қатнишиватиду. Шундақла миллий мәдәнийәт мәркәзлириниң вәкиллириму мәзкүр академияни муһим паалийәтлиридин задила чәттә қалған әмәс.
Аллеяниң ечилиш тәнтәнисидә сөз алған «Жаңғыру жолы» җумһурийәтлик яшлар һәрикитиниң әзаси Бәхтинур Сидиқова жиғилғанларни Миннәтдарлиқ күни билән тәрәққийпәрвәр яшлар намидин тәбриклигәч, мәзкүр мәйрәмниң бирлигимиз билән достлуғимизни, милләтләрара разимәнликни мустәһкәмләштә йетәкчи роль ойнайдиғанлиғини алаһидә тәкитлиди. 
Тәнтәнилик чарә-тәдбирдин кейин қатнашқучилар С.Муқанов намидики скверда Қазақстан хәлқи Ассамблеяси аллеясигә көчәт олтарғузди. Андин «Әзәрбәйҗанлар ассоциацияси» җумһурийәтлик җәмийәтлик бирләшмиси тәрипидин тәйярланған бәрикәтлик дәстихандин дәм тартти.

 Раушан ИСМАИЛОВА, 
 «Қоғамдық келісім» җумһурийәтлик дөләт мәһкимиси Алмута шәһәрлик «Достлуқ өйи» паалийитини тәминләш башқармисиниң баш эксперти.