• Әхбаратлар еқими
• 31 Наурыз, 2021

Мурәккәп вақит вақиәнамиси

Дөләт рәһбири Қасым-Жомарт Тоқаевниң 2020-жилдики паалийити тоғрилиқ «Йеңи шараиттики Қазақстан» намлиқ үчтомлуқ материаллар топлими нәшир қилинди. Бу тоғрилиқ Президентниң мәтбуат кативи Берик Уәли Facebookтики сәһиписидә хәвәр қилди.
Президент мәтбуат кативиниң тәкитлишичә, 2020-жил пүткүл дуния бирләшмиси пәқәт Қазақстандила әмәс, бәлки пүткүл җаһанда иҗтимаий-ихтисадий қийинчилиқларни пәйда қилған COVID-19 пандемиясигә қарши күрәшкән жил сүпитидә тарихқа кирди. Бизниң мәмликитимиз мошу ховупниң җиддий ақивәтлирини биринчиләрдин болуп чүшинип, өз вақтида тегишлик чариләрни көрди.
Дөләт рәһбири таҗсиман вирус инфекциясигә қарши күришиш вақтида аһали саламәтлигини күзитишкә, ихтисатниң турақлиқлиғини вә униң тәрәққият сүръитини сақлап қелишқа, билим саһасиға алаһидә диққәт бөлди. Җүмлидин 4,5 миллиондин ошуқ адәм 42 500 тәңгә миқдарида малийәвий ярдәм алди. Бир миллиондин ошуқ гражданға озуқ-түлүк вә мәиший товарлар түркүми берилди. Икки миллионға йеқин адәм несийә төләшни кейингә қалдуруш имканийитигә еришти. 700 миңдин ошуқ компания вә тиҗарәтчиләрниң селиқ жүклимиси йениклитилди.
Қасым-Жомарт Тоқаев пандемия шараитида шәхсән өзи җайларда қелиплашқан әһвал билән тонушуш, җамаәтчилик билән учришиш вә регионларниң иҗтимаий-ихтисадий тәрәққиятиниң кетип бериши билән тонушуп чиқиш үчүн Җамбул, Ақмола, Түркстан, Қостанай, Шималий Қазақстан, Алмута, Шәрқий Қазақстан вә Қариғанда вилайәтлирини зиярәт қилди. Дөләт рәһбири йеза егилигигә вә санаәткә, проблемилиқ мәсилиләрни һәл қилишқа инвестиция җәлип қилишни тапшурди.
Берик Уәли таҗсиман вирус пандемиясиниң Қазақстанниң ташқи сәясий алақилириға чоң тәсир қилғанлиғини әслитип өтти. Бу вақитта хәлиқара чарә-тәдбирләрни өткүзүшниң онлайн-тәртиви актив қоллинилди. Мәсилән, Қасым-Жомарт Тоқаев видео алақә тәртивидә БМТниң 75 жиллиғиға беғишланған Жуқури дәриҗилик чарә-тәдбиргә, БМТ Баш Ассамблеясиниң 75-сессиясиниң умумсәясий муназирилиригә, МДҺ Дөләт башлиқлири кеңишиниң, ШҺТқа әза дөләтләр башлиқлири кеңишиниң мәҗлислиригә, Түркийтиллиқ дөләтләр һәмкарлиқ кеңишиниң, Евразия ихтисадий иттипақиниң, Коллективлиқ бехәтәрлик тоғрилиқ шәртнамә тәшкилатиниң саммитлириға вә башқа учришишларға қатнашти. Президент өз докладлирида Қазақстанниң хәлиқара бехәтәрликни күчәйтиш, аләмшумул вә регионал алақиларни тәрәққий әткүзүш тәрәпдари екәнлигини тәстиқлиди.
Дөләт рәһбири 2020-жили 16-мартта телевидение арқилиқ мураҗиәт қилғандин кейин чоң ишлар әмәлгә ашурулди. Қелиплашқан әнъәнә бойичә, Президентниң мәтбуат хизмити Қасым-Жомарт Кемелоғли докладлириниң топлимини елан қиливатиду. Үч томдин ибарәт китап Дөләт рәһбириниң регионларға қилған иш бабидики сәпәрлири вақтидики, түрлүк чарә-тәдбирләрдики нутуқлирини, мураҗиәтлири билән билдүрүшлирини, елимиз вә чәт әл аммивий әхбарат васитилиригә бәргән сөһбәтлирини, түрлүк нәширләрдә бесилған мақалилирини өз ичигә алди, – дәп язди Дөләт рәһбириниң мәтбуат кативи.
Биринчи вә иккинчи томларға Қасым-Жомарт Тоқаевниң COVID-19 пандемиясини йеңип чиқишқа вә ихтисадий өсүшни әслигә кәлтүрүшкә беғишланған докладлири, аһалиниң паравәнлигини ашурушқа қаритилған программилиқ нутуқлири, шундақла хәлиқара чарә-тәдбирләрдә қилған нутуқлири киргүзүлди. 
Үчинчи томға Дөләт рәһбириниң елимиз вә чәт әл аммивий әхбарат васитилиридә елан қилинған мақалилири, сөһбәтлири кирди. Бу материалларда Қазақстанниң хәлиқара вәзийәткә мунасивәтлик мәвқәси, актуал ички сәясий мәсилиләр бойичә мулаһизиләр әкис әткән.
– Қазақстан Җумһурийити Президентиниң мәтбуат хизмити мәзкүр томламни Қасым-Жомарт Кемелоғлиниң бир жилдики паалийитиниң умумий йәкүни сүпитидә китапханлар һозуриға һавалә қиливатиду. Топламдин шундақла Дөләт рәһбири қатнашқан чарә-тәдбирләрдин чүширилгән фотосүрәтләрму орун алди. Китапта елан қилинған материаллар тәтқиқатчилар, дөләт органлириниң хадимлири үчүн баһалиқ вә пайдилиқ һөҗҗәт болиду, – дәп хуласилиди Берик Уәли.