• Әхбаратлар еқими
• 16 Наурыз, 2024

Өчмәс из қалдурған рәссамлар

Йеқинда Миллий мирасгаһниң китапханисида атақлиқ мойқәләм егилири Әбилхан Қастеев, Орал Таңсықбаев вә Гүлфайрус Исмаилованиң иҗадийитигә беғишланған «дүгләк үстәл» болуп өтти. Униңға рәссамлар билән сәнъәтшунас алимлар қатнашти.

Мәшүр САСИҚОВ,
«Uiğur avazi»

Дәсләп сөз алған рәссам, Қазақстан Җумһурийитиниң хизмәт көрсәткән әрбаби Жанұзақ Мусапир Әбилхан Қастеевниң қазақ тәсвирий сәнъитидә өчмәс из қалдуруп кәткәнлигини тилға алса, тәтқиқатчи Клара Исабаева мойқәләм егилириниң Қазақстан сәнъитини дунияға тонутуштики роли тоғрилиқ ейтип бәрди. Болупму Әбилхан Қастеев билән Орал Таңсықбаевниң әсәрлири чәт әл мирасгаһлиридин орун елип, көпчиликниң көңлидин чиқиватқанлиғини қәйт қилди. У шундақла Қазақстан сәнъитини башқиларға тонутуш үчүн һәрхил форматтики экскурсияләр, презентацияләр, «дүгләк үстәлләрни» уюштуруп, аммивий әхбарат васитилири билән зич мунасивәт бағлаш керәклигини алға сүрди.
Киношунас, Қазақ Миллий сәнъәт академиясиниң чоң оқутқучиси Камилла Габдрашитова Гүлфайрус Исмаилованиң «Қыз Жібек» фильми үчүн миллий кийим-кечәк тәвсийә қилип, зәргарлиқ буюмлар билән реквизитларни ясап, қазақ киносиниң тарихида қалғанлиғини әскә салди. Рәссам, этнограф Қалиолла Ахметжан Ә.Қастеевниң портрет селиштики маһаритигә тохталди. Мәсилән, у Амангелды Имановниң рәсимини сизиш үчүн батурниң туғулуп өскән жутиға берип, уни тиригидә көргән адәмләр билән учришип, тарихий шәхсниң обризини яритишқа көп вақтини сәрип қилған екән.
«Дүгләк үстәл» давамида қатнашқучилар арисида рәссамларниң иҗадий паалийитигә бағлиқ викторина уюштурулуп, ғалип чиққанлар баһалиқ соғилар билән мукапатланди.