• Әхбаратлар еқими
• 20 Наурыз, 2024

Бәс-муназириләр мәйдани

Һәммимизгә мәлумки, һәқиқий мәнада Миллий қурултай хәлиқ билән һакимийәт арисидики диалогниң нәтиҗидар васитиси. У гражданлиқ җәмийәтни шәкилләндүридиған чоң мәйдан. Әң муһими, қурултай тәркивидә һәрхил пикирдики, бир-биригә охшимайдиған мәвқәдики, яшлириму һәрхил, елимиздә яхши тонулған шәхсләр бар. Алимлар, депутатлар, шаир-язғучилар, блогерлар, юристлар – буларниң һәммиси өз кәспидә чоң утуқларға йәткән шәхсләр. Амма уларниң һәммисини бир мәхсәт бириктүриду. У мәхсәт – Йеңи Адаләтлик Қазақстан қуруш, елимизни тәрәққий әткүзүш, течлиқни, бирликни, өмлүкни сақлаш, хәлиқ паравәнлигини ашуруштин ибарәт. Президент Қасым-Жомарт Тоқаев җарий қилған ислаһатларниңму асасий йөнилиши шу. Бу йәрдә шуни алаһидә тәкитләш лазимки, Дөләт рәһбириниң шәхсән өзиниң әйнә шу өзгиришләргә болған ишәнчиси. У елан қилған планлар, лайиһиләр, тәшәббуслар мәбләғ җәһәттинму, тәшкилий ишлар тәрәптинму тәминләнгән. Һазир қисқа муддәттики вәзипиләр келәчәктики мәхсәтләрниң асаси болидиғанлиғи ениқ. Биз өтмүшкә қараш адитидин айрилип, алға интилишимиз лазим. Әлвәттә, Президент зиялиларниң җәмийәттики ролини алаһидә қәйт қилип, уларға жүклинидиған вәзипиләр һәм җавапкәрликниң жуқури екәнлигини ейтти.
 Миллий қурултай — очуқ пикир изһар қилиш мәйдани. Бу йәрдә сәясий оппонентлар өзлириниң ойлирини, тәклиплирини биллә муһакимә қилиду, улар елимиз келәчиги үчүн өзлириниң җавапкәрлигини яхши һис қилиду.
 Қурултай тәркивидә Қазақстан хәлқи Ассамблеясиниң бир топ вәкиллири, йәни рус, өзбәк, корей, уйғур, чечен, немис хәлиқлириниң вәкиллири бар. ҚХА әзалири қурултайниң асасий ядросиниң бири, биздә җавапкәрлик икки һәссә жуқури десәм, мубалиғә болмас Чүнки биз Ассамблея байриғини көтирип келиватимиз. Қазақстанда яшаватқан хәлиқләрни биллә яшашқа тәғдир қошқан. Мениңчә, дөләт территорияси яки өтмүштики утуқлири билән әмәс, бәлки мошу әлдә яшаватқан хәлиқниң паравәнлиги, әркинлиги, бирлиги, өмлүги билән улуқ дөләт болалайду. Әгәр мошу қәдрийәтләрни биз яш әвлатқа тапшурсақ, демәк, вәтинимизниң келәчиги парлақ болиду. 
 Әң муһими, биз Президентниң ислаһатлирини, курсини, тәшәббуслирини қоллап-қувәтлишимиз керәк.

Ахмед МУРАДОВ, 
«Вайнах» Қазақстан чечен вә ингушлири ассоциациясиниң һәмрәиси, ҚХА кеңишиниң әзаси