• Әхбаратлар еқими
• 20 Наурыз, 2024

Тойниң боларидин, болидуси қизиқ

Мәлумки, бийил Норуз мәйрими йеңи форматта нишанлиниватиду. «Тойниң боларидин, болидуси қизиқ» демәкчи, бу қетим мәйрәмни норузниң он төртидин башлавәттуқ. Бу күни Уйғур наһийәсиниң мәркизи – Чонҗа йезисида Көрүшүш күнигә беғишланған «Амал кәлди – Жил кәлди» намлиқ чоң чарә-тәдбир өткүзүлди.  

Сабирәм ӘНВӘРОВА, 
«Uiğur avazi»

Мәйрәмгә беғишланған мәрасимға наһийә һакими Бота Елеусизова вә униң орунбасарлири, наһийәдики мәһкимә, башқармиларниң рәһбәрлири, депутатлар, жут мөтивәрлири, этномәдәнийәт мәркизиниң вәкиллири билән яшлар паал қатнашти. Шу җүмлидин концертлиқ программини тамашә қилишқа кәлгән турғунларму аз болмиди. Мәйрәмни сеғинған хәлиқ бир-бири билән дидарлишип, әһмийәтлик күнни әстә қаларлиқ дәриҗидә атап өтти.
Чарә-тәдбир «Жазерке» вә «Арзу» ансамбльлири сәнъәткарлири тәрипидин тәйярланған сәһнилик көрүнүш билән башлинип, Норузға, баһарға беғишланған музыкилиқ номерлар билән давам қилди. Болупму Көрүшүш күнигә беғишланған көрүнүш тәнтәниниң  маһийитини  толуқ ечип бәрди.  
  –  Көрүшүш мәйрими – амал мәйрими. Көрүшүш күнидә хәлиқ қиштин аман-есән чиққанлиғиға хошал болуп, бир-бири билән қол елишиду. Бу күни барлиқ өч-адавәт унтулуп, кәчүрүлиду. Таңниң етиши билән көрүшүш күнини тәшналиқ билән күткән һәрбир өй алдин-ала тәйярлинип, дәстихан яйиду. Аилә әзалири бир-биригә «Бир йешиң билән!» дәйду. Бу адәмниң йәнә бир яшқа әр йетишини вә жил давамидики аманлиғини билдүриду. Кейин хошнилири билән көрүшиду. Яш аилилиләр чоң аилиләргә кирип, көрүшүп чиқиду. Чоңлар кичикләргә дуасини берип, яхши тиләклирини ейтиду, –  деди риясәтчиләр бу күнниң мәзмуниға чоңқур тохтилип.
Өз новитидә сөзгә чиққан наһийә һакими Бота Серикқизиму улуқ мәйрәмниң беши болған Көрүшүш күниниң барчә яхшилиқниң, тоқчилиқ вә течлиқниң, бирлик вә бәрикәтниң башлиниши екәнлигини қәйт қилди. Натиқ наһийә турғунлирини мәйрими билән тәбрикләп, жут-җамаәтни Норузниң һәр күнини мошундақ жуқури дәриҗидә атап өтүшкә чақирди.    
Хулләс, очуқ асман астида өткән мәрасим жут мөтивәрлириниң ақ дуаси билән тамамланди. Көрүшүш күнидә чоңға – һөрмәт, кичиккә – иззәт көрситилип, әң есил тиләкләр ейтилди. Мәйрәмгә миллий кийимлирини кийип кәлгән турғунлар чарә-тәдбирниң ахирида бир-бирини тәбрикләп, ялдама үчүн рәсимгә чүшти. 

Алмута вилайити,
Уйғур наһийәси