• Әхбаратлар еқими
• 28 Наурыз, 2024

«Мәрһәба, Норуз!»

Қуддус Ғоҗамияров намидики җумһурийәтлик дөләт академиялик Уйғур музыкилиқ-комедия театри баһар билән биллә қәдәм тәшрип қилған йеңи жилни «Мәрһәба, Норуз!» концертлиқ программиси билән күтүвалди.
Концерт «Рухсарә» ансамблиниң «Тәнтәниси» билән башланди. Сазға маслашқан уссулчи қизларниң сәһнидики әвришим һәрикити көкләмдә ойғанған тәбиәтни әкис әттүрәтти. Андин «Сада» эстрада ансамблиниң орунлишидики «Сөйгү гөзәл», Ризат Мамутниң иҗрасидики «Кәлгинә», Луиза Розахунова билән Рисам Мамутов яңратқан «Сөйгү сази», Халмурат Мунаров, Рисам Мамутов, Үмүт Қасимов күйлигән «Йеңичә муһәббәт» нахшилири тамашибинни адәмизат үчүн мәңгүлүк мавзуға айланған сөйгү-муһәббәт деңизиниң ишқ-һиҗран кемисидә сәйлә қилдурди.
 «Көңлүңни алай дәп кәлдим» (Меһрат Рәхмәтҗан), «Норуз Гүли» (Дилшат Аманбаев), «Қаракөз» хәлиқ нахшиси (Дилбәр Бурһанова) , «Баһар» (Эмина Рәхмәтҗан) «Норуз кәлди» (Меһрәт Рәхмәтҗан, Саһиб Абдумайин, Эльдар Абдуллаев, Бәхитҗан Авдунов) нахшилири баһар чақирған көңүлләргә мәлһәм болди дейишкә болиду. 
«Норуз гүли» болалиған Эльмира Абдуллаева, «Су пәрисини» қияслиған Ләйли Искәндәрова, «Сәһрадики муһәббәтниң» қәһриманлири Гүлнарә Турсунова, Илһам Исраиловниң иҗрасидики уссулларму тамашибинлар алқишиға еришти. 
Концерт «Нава», «Рухсарә» ансамбльлириниң орунлишида «Чаргаһ» муқаминиң мәшриви билән аяқлашти.