• Әхбаратлар еқими
• 12 Сәуір, 2024

Бирлик билән бәрдашлиқниң үлгиси

Президент Қасым-Жомарт Тоқаев иҗтимаий тор арқилиқ қийин пәйттә ярдәм беришқа тәйяр екәнлигини тәкитлигән қериндаш әлләр билән су басқан регионларда турғунларға қол учини созуватқан вәтәндашлиримизға миннәтдарлиқ изһар қилди.
 «Елимизниң бирқатар регионлирида тәбиий апәт болған пәйттин бери мениң намимға қериндаш дөләтләрниң рәһбәрлиридин иллиқ тиләклири билән ярдәм бериш бойичә тәклиплири йезилған хәтләр келиватиду. Қазақстан су кәлкүни пәйтидә ярдәм беришкә тәйяр екәнлигини билдүргәнлиги үчүн қериндаш әлләргә чин жүрәктин тәшәккүр ейтиду.
 Мениң тапшурмам билән Премьер-министр башлиған җумһурийәтлик штаб пәвқуладдә вәзийәтниң ақивәтлирини имканқәдәр азайтиш үчүн нәтиҗидар чариләр қобул қиливатиду. Зәрдап чәккән барлиқ гражданға һаҗәт ярдәм көрситилмәктә. Уларниң пүткүл чиқимлири төлиниду. Һечким нәзәрдин сирт қалмайдиғанлиғини вәтәндашлиримға беғишланған мураҗиитимдә ейттим. Апәткә қарши күрәш давамлишиватиду.
 Қийин пәйттә хәлқимиз өзини йәнә бир қетим әң яхши тәрипидин көрситип, бирлик билән бәрдашлиқниң үлгисини намайиш қилғини хошал қилиду. Қазақстан гражданлириға чин жүрәктин миннәтдарлиқ изһар қилимән!» дәп тәкитләнгән Президентниң иҗтимаий тордики сәһиписидә.