• Әхбаратлар еқими
• 18 Сәуір, 2024

Мәдәний ядикарлиқлардин башланди

Мәлумки, Қазақстан Җумһурийитиниң Президенти Қасым-Жомарт Тоқаевниң тапшурмиси билән 8-үмүт күнидин башлап елимизниң су кәлкүни йүз бәрмигән вилайәтлири билән шәһәрлиридә «Таза Қазақстан» җумһурийәтлик экологиялик акция башлинип, кочиларни тазилаш, гүлләндүрүш вә аһалилиқ пунктларни аватлаштуруш ишлири қолға елинди. Бу ишлардин Алмута вилайитиму истисна әмәс. Вилайәт һакими Марат Султанғазиевниң рәһбәрлигидә тәвәдә «Хасийәтлик макан» акцияси башланди.

Рашидәм РӘҺМАНОВА,
«Uiğur avazi»

Изгү ишларни өз ичигә алған чарә-тәдбир давамида Җамбул наһийәсидики «Жамбыл Жабаев» мирасгаһи, «Таңбалы» қоруқ-мирасгаһи, Талғир наһийәсидики «Талғар» шәһәрчиси вә «Жаңа» репрессия қурванлириға беғишланған мирасгаһ, Уйғур наһийәсидики «Шарын» миллий тәбиий парки, Қарасай наһийәсидики Қарасай батыр вә Или наһийәсидики Өтеген батыр ядикарлиқлириниң әтрапи тазилинип аватлаштурулди. Ушбу ишларға 800гә йеқин адәм қатнашти. 
«Хасийәтлик макан» акцияси «Тамғалы тас» тарихий-мәдәний ядикарлиқни тазилаштин башланди. Атап кетиш керәкки, бу йәрдики XIV — XVI әсирләрдә яр ташларда пәйда болған Будда вә Бурхановниң аламәт чирайлиқ сүрәтлири билән тибәт йезиқлири көплигән туристларниң диққитини өзигә җәлип қиливатиду. Улар очуқ асман астидики буддистларниң ибадәтханисини әслитиду.
– «Елимизниң көплигән тәвәлири үчүн қийин мәзгилдә, биз су кәлкүнидин зәрдап чәкмигән вилайәт вә наһийәләрниң турғунлири, бирлишип, өйлиримиз, һойлилиримиз, кочилиримиз вә йезилиримизни рәткә кәлтүрүшимиз керәк» деди «Таза Қазақстан» җумһурийәтлик экологиялик акциясини башлиған Дөләт рәһбири Қасым-Жомарт Тоқаев. Акцияниң асасий йөнилиши – «Киелі мекен» лайиһиси. Униң биринчи һәптисидә тарихий-мәдәний ядикарлиқларни аватлаштуруш ишлирини әмәлгә ашуруш көздә тутулған. Бу һәптилик Алмута вилайитидин башлиниватиду. Сәвәви, униң тарихи бай һәм чоңқур. Вилайәттә 1200гә йеқин тарихий вә мәдәний ядикарлиқ болса, униң 961 археологиялиқ орунлар болуп тепилиду. Талғир (Талхиз), Қарамерген шәһәрчилири вә «Таңбалы» қоруқ-мирасгаһи ЮНЕСКОниң дуниявий мәдәний орунлар тизимиға киргән. Бүгүн биз бирнәччә әсирниң бәлгүси бар Таңбалы таш чатқаллиғиға келип, уни тазилашни қолға еливатимиз. Ушбу изгү ишқа қатнашқан барлиқ инсанларға миннәтдарлиғимни билдүримән», – деди Марат Султанғазиев.
Шуниң билән «Хасийәтлик макан» акцияси давамида тәвәдики 70тин ошуқ тарихий-мәдәний орунлар бир мәзгилдә рәткә кәлтүрүлди. Униңға вилайәтниң турғунлири паал қатнашти.
Әскә салсақ, «Таза Қазақстан» җумһурийәтлик экологиялик акцияси 11-мәмүргичә давамлишип, униң бәш һәптиси «Таза өлкә», «Хасийәтлик макан», «Йешил өлкә», «Үлгилик әвлат» вә «Мөлдүр булақ» мавзулириға беғишлиниду.

ИЛАВӘ: әзиз Вәтинимиз Қазақстан – дунияйүзидики тәбиити әң гөзәл дөләтләрниң бири. Әпсус, тазилиғи тәрипидин махтиналмаймиз. Бирақ Президентимизниң тәшәббуси билән қолға елинған тазилиқ ишлар түпәйли умумий өйүмизгә ғәмхорлуқ билән қарап, уни дурус күтүп, қәдирләшни үгинимиз дегән үмүтимиз чоң. Аста-аста әлдики туризм саһасини риваҗландуруп, шу арқилиқ ихтисадимизни җөндәвалсақ, нур үстигә нур болар еди.

Алмута вилайити,
Әмгәкчиқазақ наһийәси