• Әхбаратлар еқими
• 18 Сәуір, 2024

«Төһмәт»

Йеқинда Алмутида «Төһмәт» намлиқ йеңи уйғурчә сериалниң тонуштуруш мәрасими болуп өтти. Униңға бир топ жут-җамаәтчилик вәкиллири, Алмута шәһәрлик Уйғур этномәдәнийәт мәркизиниң рәиси Һосманҗан Обулов билән шәһәрлик ханим-қизлар кеңишиниң рәиси Роза Абубәкриева қатнашти.

Мәшүр САСИҚОВ,
«Uiğur avazi»

Мәлумки, «Төһмәт» сериали бүгүнгә қәдәр бир түркүм ана тилимизда фильмлар чүширип, уни көпчиликниң диққитигә һавалә қилип келиватқан Бавдун Амутовниң новәттики әмгиги. Униңда асасән, заман рәптайиға бола, адәмләр арисида йүз бериватқан көңүлсизликләрдин ташқири, пул, мал-дуния қоғлиған шәхсләрниң һаяти тәсвирлиниду. Расти, «Төһмәт» уйғур тилида чүширилгән дәсләпки сериал десәк, мубалиғә әмәс. 
Мәрасимда көпчилик фильмдин үзүндиләрни тамашә қилди. Андин униң рәсмий қисмида сөзгә чиққан Һосманҗан Обулов алған тәсиратлири билән бөлүшкәч, сериалда һәқиқәтәнму инсанлар арисидики, болупму яшлар һаятиниң орун алғанлиғини алаһидә тилға алди. Шундақла у аз вақит ичидә чүширилгән сериалда рольларни иҗра қилған Бәхитҗан Авдунов, Баһаргүл Әхмәдиева, Турсунҗан Илиев, Шөһрәт Мәмәтов, Шахназ Анайәтова, Альбина Мурадилова охшаш яш актерларниң талантиға қайил болған һалда, уларға миннәтдарлиғини билдүрүп, пәхрий ярлиқларни тапшурди. 
Ахирида «Төһмәт» сериалиниң муәллипи һәм режиссери Бавдун Амутов сөз елип, сериалниң дунияға келиши мабайнида яр-йөләк болған барлиқ шәхсләргә рәхмитини ейтти:
– Әлвәттә, һәммиңларға мәлум болғинидәк, һазир сериал әмәс, қисқа метражлиқ фильм чүшириш асан әмәс, – деди Бавдун Амутов. Униңға кетидиған хираҗәтни һәркимниң янчуғи көтириши натайин. Һә, шуниңға қаримай, биз имканийитимизниң яр беришичә, ушбу сериални чүшәрдуқ. Шуңлашқа, бүгүнки пурсәттин пайдилинип, сериалимизниң утуқлуқ чиқишиға өзлириниң биркишилик төһписини қошқан Қ.Ғоҗамияров намидики җумһурийәтлик дөләт академиялик Уйғур музыкилиқ-комедия театрида әмгәк қиливатқан һәм мениң билән ишлигән, дайим биллә вә бирқатар фильмларда рольларни иҗра қилған яш актерларға, операторлардин Марат Зулияров билән башқиму мутәхәссисләргә чәксиз миннәтдарлиғимни изһар қилмақчимән.
Тәкитләш керәкки, «Төһмәт» сериали пат-йеқинда You Tubeқа рус вә уйғур тиллирида чиқиду.