• Әхбаратлар еқими
• 18 Сәуір, 2024

Театримиз пәхри

Йеқинда Қ.Ғоҗамияров намидики җумһурийәтлик дөләт академиялик Уйғур музыкилиқ-комедия театрида уйғур сәнъитидә өзигә хас орни бар, театрниң иҗадий йүксилишигә бебаһа үлүш қошқан атақлиқ актер һәм режиссер, мәрһум Муһитҗан Йолдашоғли Һезимовниң туғулғиниға 70 жил толуши мунасивити билән хатирә кечилиги болуп өтти. 
Пүткүл аңлиқ һаятини миллий сәнъитимизниң тәрәққиятиға беғишлиған бу инсанниң дуниядин өткинигә бийил алтә жил толди. Муһит Һезимов... Уйғур тамашибинлири бу сәнъәткарниң исмини өткән әсирниң сәксининчи жиллиридин бу ян тонушқа башлиди. Шу чағлардики театрниң баш режиссери Қадыр Жетписбаев униңға алаһидә ишәнчә билән пәқәт чоң рольларни тапшуратти. Чүнки актерлуқ – у режиссерға беқинидиған кәсип. Әгәр режиссер сениң маһаритиңни ечип берәлмисә, роль билән сени тәминләлмисә, демәк, ундақ театрда ишләшниң һаҗитиму йоқ. Мошу турғудин алсақ, Муһитҗан Һезимов «Анархандики» — Һәмра, «Қыз-Жибектики» — Төлеген, «Ләйли-Мәҗнун», «Бир яз, бир қиш», «Пәрһат-Шерин», «Одиссейниң ғәзивидин» башланған ашиқ-мәшуқлар ривайәтлиридики талай рольларни ойниған талант егиси. 
Хатирә кечилигидә әйнә шундақ шәхс М.Һезимовниң режиссерлиғида сәһниләштүрүлгән «Ипархан», «Гүлдәстә», «Ғунчәм» қатарлиқ спектакльлардин үзүндиләр көрситилди. Бу күни сәнъәткарни әсләп, сәһнигә чиққан кәсипдашлири Қазақстанниң хизмәт көрсәткән артисти Реһангүл Мәхпирова өз иҗадийитидин шеир оқуса, режиссер Әзиз Искәндәров, Әдәбият бөлүминиң башлиғи Гүлбаһар Насирова М.Һезимовниң актер һәм режиссер сүпитидә миллий сәнъитимизгә қошқан төһписи һәққидә тәпсилий тохталди. Андин М.Һезимовниң шагиртлири Т.Жүргенов намидики Қазақ миллий сәнъәт академиясиниң оқутқучилири Ерғали Төкеев, Талғат Көбеков, Қ.Ғоҗамияров намидики җумһурийәтлик дөләт академиялик Уйғур музыкилиқ-комедия театриниң бәдиий рәһбири Фархатбек Канафин устазиниң қазақ сәнъитигиму қошқан чоң төһпилири һәққидә ейтип өтти.
Кәч ахирида сәнъәткарниң рәпиқиси Роза Бәхтибаева сөзгә чиқип, мәзкүр кәчни уюштурған театр мәмурийитигә, шәхсән униң сценарий муәллипи Гүлбаһар Насирова билән режиссери Әзиз Искәндәровқа аилиси намидин чәксиз рәхмитини ейтти.

Надира ӨМӘРОВА,
Қ.Ғоҗамияров намидики җумһурийәтлик 
дөләт академиялик  Уйғур музыкилиқ-
комедия театриниң мәтбуат кативи
Алмута шәһири