• Мәшъәл
• 18 Сәуір, 2024

Оюнхумарлар арисида җинайәт көпәймәктә

Мәлумки, өткән айда Парламент Мәҗлисидә оюн бизнеси, лотерея вә лотерея паалийити мәсилилири бойичә айрим қанун актлириға өзгиришләр вә толуқтурушлар тоғрилиқ қанун лайиһиси муһакимә қилинған еди. Мошу қанун лайиһисини муһакимә қилиш пәйтидә ички ишлар министриниң орунбасари Игорь Лепеха оюнхумарлар тәрипидин әмәлгә ашурулған җинайәтләрниң статисткисини кәлтүрди. «Биз мошу муһакимигә келиштин илгири тәргәв департаменти билән ениқ җинаий ишларни тәһлил қилдуқ. Нурғун җинайәтләрниң асасий сәвәплири оюнхумарлиққа берилгәнниң ақивитидин болғанлиғи ениқ болмақта. Бизниң мәлуматлиримиз бойичә өткән жили лудомания билән ағрийдиған шәхсләр 300 һәрхил җинайәтни әмәлгә ашурған. Бийил болса, мошундақ 16 җинаий иш тиркәлди», деди Игорь Лепеха. Министрниң әхбаритичә, 300 җинайәтниң ичидә икки адәм өлүми, 25 тонаш, 80 мәккарлиқ вә 170 оғрилиқ фактлири тиркәлгән. «Бу қорқунучлуқ статистика. Әпсуслинарлиғи, бу һәммиси әмәс. Булар пәқәт биз қолумизға елип, қарап чиққанлар. Шуңлашқа мәсилә наһайити җиддий. Наһайити нурғун мәбләғ һәққидә сөз болмақта. Мәсилән, бир граждан өзи рәһбәрлик қиливатқан мәһкимиләрдин 980 миллион тәңгини оюнларға доға тиккән. Әнди Астанада бир адәм аяли ухлаватқан пәйттә телефонини елип, ахчини оюнларға салмақчи болған. Мошу вақитта аяли охинип кетиду. Һелиқи адәм шу йәрдила аялини һәм униң туққинини өлтүрүвәткән. Көрүп туримизки, әһвал наһайити җиддий. Униң алдини елиш һаҗәт» деди министрниң орунбасари. 
 Мутәхәссисләр лудоманияниң елимиздә тәрәққий етишиниң сәвәплири сүпитидә хумар оюнлириниң қолйетимлиқлиғи, Интернетта сайтларниң көплигини көрсәтмәктә. 2022-жили елимиздә 3 676 адәм өз өзигә қол салған. Уларниң һәр бәшинчисиниң сәвәви, лудомания болған.