• Әхбаратлар еқими
• 18 Сәуір, 2024

Мәхсәт – бехәтәрликни тәминләш

Мәркизий, Шималий, Ғәрбий вә Шәрқий Қазақстан вилайәтлиридә йүз бәргән су кәлкүни су қоймилири билән гидротехникилиқ қурулумларниң техникилиқ әһвалиға җиддий нәзәр ағдуруш керәклигини әскә салди. Йеқинда Алмута вилайитигә иш сәпири билән қәдәм тәшрип қилған Қазақстан Җумһурийити Парламенти Сенатиниң депутати Жанболат Жөргенбаев Әмгәкчиқазақ наһийәсидә болуп, бу йәрдики әһвал билән тонушти. Униңға Қазақстан Җумһурийити Су ресурслири вә ирригация министрлигиниң Су егилиги комитети рәисиниң орунбасари Мақсат Аяшев, Алмута вилайәтлик мәслиһәтниң рәиси Қуат Байғоджаев вә Алмута вилайәтлик йеза егилиги башқармиси «Алматыоблводхоз» мәһкимисиниң рәһбири Бауыржан Ойшынов сәпәрдаш болди.

Рашидәм РӘҺМАНОВА,
«Uiğur avazi»

Атап кетиш керәкки, бу Жанболат Жөргенбаевниң тәвәгә биринчи қетим келиши әмәс. У өткән жилиму наһийәдә болуп, ирригация системисини көздин кәчүрүп, наһийәлик саһа рәһбәрлиригә йол-йоруқ көрситип, ениқ тапшурмиларни бәргән еди. Сенатор башлиған топ алди билән Бартоғай су қоймисиға барди. Уларни бу йәрдә наһийә һакими Талғат Байедилов, наһийәлик мәслиһәтниң рәиси Бекет Ахметов вә Д.Қонаев намидики Чоң Алмута канили «Казводхоз» шөбисиниң рәһбири Мейрам Арыстанов күтүвалди.
Мейрам Арыстанов су қоймиси вә каналниң тарихи вә униңға бағлиқ проблемилиқ мәсилиләргә тохталди. Мәлумки, Бартоғай су қоймиси вә Д.Қонаев намидики Чоң Алмута канили буниңдин 40 жилдин ошуқ вақит илгири селинған. Қойма 320 миллион кубометр суни сақлаш имканийитигә егә. У өз вақтида 6 наһийәни су билән тәминлигән болса, жиллар өтүп, қурулумларниң тозуп кетишигә бағлиқ пәқәт Әмгәкчиқазақ вә Талғир наһийәлириниң деханлириға хизмәт қиливатиду. Шуңлашқиму вилайәт даирисидә су тапчиллиғи моҗут болуп, қойма вә канал җөндәш ишлирини тәләп қилиду.
– 25-үмүттин тартип каналға су қоюп беримиз. Шу күндин башлап дехан егиликлири етиз-ериқлирини суғиришқа башлайду. Тәвәдә қар-ямғурниң йетәрлик болушиға қаримай, су тапчиллиғи бар. Чүнки улар 40 жилдин бери бирму қетим ремонттин өтмигән у наһайити тозуп кәткән. Шуңлашқиму бийил қойма вә канал мурәккәп ремонттин өтиду, дәп үмүт қилимиз. Һазир лайиһәлик-сметилиқ һөҗҗәтләр тәйярлиниватиду. Гидротехникилиқ қурулумларни мустәһкәмләп, су башқуруш автоматлирини орнитиш лазим, – дәйду «Казводхоз» шөбисиниң рәһбири.
 Канал сүйи 170 чақиримға йетиду. Шуңлашқиму йүзлигән дехан егиликлириниң тәғдири униңға бағлиқ. Бирақ суниң көп қисми каналниң йерилип вә сунуп кәткән йәрлиридин еқиватиду.
Мақсат Аяшев су саһасини рәтләш бойичә бәлгүлүк ишларниң кетип барғанлиғи һәққидә ейтип, Бартоғай су қоймисини җөндәштин өткүзүш үчүн 3,5 миллиард тәңгә, әнди Қазақстандики барлиқ су қоймилирини ремонтлаш үчүн 2-3 триллион тәңгә һаҗәт екәнлигини йәткүзди. Униң ейтишичә, терилғулуқлар билән етиз-ериқ вә бағларни су билән толуқ тәминләш – дөләттики әң муһим мәсилиләрниң бири. Елимиздә еғир су тапчиллиғини тартиватқан регионлар бар. Шуңлашқиму һәрбир тамча суни ихчамлап пайдилиниш керәк. Су болмиса, һәрқандақ илғар технологияләрму ярдәм қилалмайду.
Сенатор башлиған топ қойма вә канални көрүп чиқип, Алмута вилайитини су билән тәминләватқан стратегиялиқ объектниң қийин әһвалиға көз йәткүзди.
– Парламент вә Сенатта Бартоғай су қоймиси вә Д.Қонаев намидики Чоң Алмута канилиниң мәсилисини көтирип, униң һәл болуши үчүн өзәмниң биркишилик төһпәмни қошимән, дәп вәдә беримән. Бирақ йәрлик вә регионаллиқ һакимийәтлири, наһийәлик вә вилайәтлик мәслиһәтләр депутатлириму күч чиқириши лазим, – деди Жанболат Жөргенбаев.

Алмута вилайити,
Әмгәкчиқазақ наһийәси