• Асасий мақалилар
• 08 Желтоқсан, 2021

«Алтын сапа» вә «Парыз» мукапатлири тапшурулди

Дөләт рәһбири видеоконференцалақә тәртивидә Қазақстан Җумһурийити Президентиниң «Алтын сапа» вә «Парыз» мукапатлирини тапшуруш мәрасимида сөзгә чиқти.
Қасым-Жомарт Тоқаев «Алтын сапа» конкурси өткүзүлүп келиватқан 15 жил мабайнида 150тин ошуқ компанияниң Президент мукапитиниң лауреатлири болғанлиғини тәкитлиди.
– Бийилқи тәнтәнилик мәрасимниң Мустәқилликниң 30 жиллиғиға мас келиватқанлиғи чоң рәмзлик әһмийәткә егә. Мошу вақит ичидә Қазақстанда бизнесни тәрәққий әткүзүш үчүн барлиқ шараитлар яритилди. Нәтиҗидә йеңи вақит тәләплиригә җавап беридиған пүтүнсүрүк тиҗарәтчиләр топи мәйданға кәлди. Улар миллий ихтисатниң асасий һәрикәткә кәлтүргүчи күчигә айланмақта, – деди Қасым-Жомарт Тоқаев.
 Президент ички бизнесниң мәмликәтни индустрияләштүрүшкә қошуватқан һәссиси тоғрилиқ гәп қилип, кейинки 10 жилда мәһсулат ишләш санаитиниң ихтисаттики үлүшиниң тағ-кан саһасиниң көрсәткүчидин ешип кәткәнлигини вә 13 пайизға йәткәнлигини атап көрсәтти.
 – Пүткүл мәмликәт бойичә 1 500 йеңи ишләпчиқириш орни ечилди. Бу мәхсәтләргә 9 триллион тәңгидин ошуқ инвестиция селинди. 220 миңдин ошуқ турақлиқ иш орни вуҗутқа кәлтүрүлди. Өткән жили мәһсулат ишләш санаитиниң экспорти үч һәссә өсүп, 15,4 миллиард долларға йәтти. Бүгүнки күндә Қазақстанда қайта ишләнгән мәһсулат 131 мәмликәткә чиқирилиду, –дәп тәкитлиди Қасым-Жомарт Тоқаев. 
 Дөләт рәһбири шундақла ички санаәтни рәқәмләштүрүштики, медицина пәнидики утуқларниму тилға алди. 
 Президент мәрасим қатнашқучилириға мураҗиәт қилип, өзиниң хәлиққә йоллиған Мәктүбидә 2025-жилға қәдәр мәһсулат ишләш санаитиниң экспортини 1,5 һәссә, әмгәк үнүмини 30 пайиз ашуруш вәзиписини қойғанлиғини әслитип өтти. Униң сөзичә, бу наһайити җиддий мәхсәтләр, уларни қолға кәлтүрүш үчүн барлиқ имканийәтләр бар, барлиқ зөрүр шараит яритиливатиду. Бу йосунда Қасым-Жомарт Тоқаев «Санаәт сәясити тоғрилиқ» қанунни чапсанирақ қобул қилишниң муһим екәнлигини тәкитлиди, у ички мәһсулат ишләш карханилирини әрзән хам әшия билән тәминләш имканийитини бериду.
 Дөләт рәһбири униңдин ташқири ички бизнесниң хошна әлләр базириға чиқиш үчүн заманивий инфрақурулумниң тәрәққий әткәнлиги тоғрилиқ тохталди. 
 – «Қорғас» Хәлиқара чегара йенидики һәмкарлиқ мәркизи утуқлуқ ишләватиду. Бу иш даирисидә йәнә төрт чегариларара мәркәз – Россия билән болған чегарида икки, Өзбәкстан вә Қирғизстан билән болған чегариларда бир-бирдин – қурулуши планлиниватиду. Бу транзакция чиқимлирини төвәнлитиш, транспорт логистикисиниң нәтиҗидарлиғини ашуруш вә нәтиҗидә экспортни көпәйтиш имканийитини бериду, – деди Президент. 
 Дөләт рәһбири шундақла мәмликәттә чиқириливатқан товарларниң сүпитини ашурушниң вә заманивий сүпәт системисини җарий қилишниң муһим екәнлигини тәкитлиди. 
– Карханиларда бизнес-җәриянларни диагностика қилиш мошу саһадики миқияслиқ тенденцияләргә мувапиқ келиши керәк. Сөз һәммидин авал рәқәмләштүрүш вә Индустрия 4.0 элементлирини пайдилиниш тоғрилиқ болуватиду. Мошуниңға бағлиқ «Алтын сапа» конкурсиниң тәләплирини басқучлуқ асаста Европа сүпәтни башқуруш фондиниң (EFQM) йеңи үлгилиригә мувапиқ кәлтүрүш керәк. Биз әң яхши хәлиқара үлгиләргә вә әмәлиятқа маслишишимиз керәк, – дәп тәкитлиди Қасым-Жомарт Тоқаев. 
 Дөләт рәһбири шуниң билән бир қатарда санаәттә квалификациялик мутәхәссисләрниң йетишмәйватқанлиғиға диққәтни җәлип қилди, бу индустрияләштүрүшни арқиға созуватқан амилларниң бири болуп һесаплиниду.
 – 2025-жилға қәдәр биз 500гә йеқин индустриал лайиһини ишқа қошушни нийәт қиливатимиз. Һөкүмәт һазирниң өзидә мошу ишләпчиқириш орунлири үчүн квалификациялик кадрларни тәйярлашни башлиши керәк. Һазир дөләт иш бәргүчиләрни қоллап-қувәтләшниң ениқ чарилирини көрүватиду. Иш орнида оқутуш, «әвлатлар шәртнамиси» вә «биринчи иш орни» охшаш яш мутәхәссисләргә ярдәм қилиш чарилири әмәлгә ашурулуватиду. Дөләт тәрипидин тегишлик субсидияләр көздә тутулған, бирақ улар йетәрлик әмәс. Һөкүмәт «Атамекен» Миллий тиҗарәтчиләр палатиси билән бирликтә иш билән тәминләшни вә хадимлар квалификациясини ашурушни рәғбәтләндүрүшниң қошумчә чарилирини ишләп чиқиши керәк, – деди Қазақстан Президенти.
 Қасым-Жомарт Тоқаев өз сөзидә Қазақстан бизнесиниң вә мәмликитимиздә ишләватқан хәлиқара компанияләрниң иҗтимаий җавапкәрлик принциплириниң қәтъий тәрәпдари екәнлигини тәкитлиди. Җүмлидин улар пандемия вақтида саламәтликни сақлаш системисиға чоң ярдәм қилди. Униңдин ташқири «Парыз» конкурсиниң бу қетимқи қатнашқучилири иҗтимаий лайиһиләргә вә хәйрихаһлиқ акцияләргә 20 миллиард тәңгигә йеқин мәбләғ сәрип қилди. Улар йәттә миң йеңи иш орнини вуҗутқа кәлтүрди.
 – Бизнес вәкиллири мәмликәтниң гүллинишигә вә хәлиқ паравәнлигиниң ашурулушиға һәссә қошуватиду. Шу мунасивәт билән барлиқ тиҗарәтчиләргә сәмимий тәшәккүр изһар қилимән. Шундақла мошу конкурсларға қатнашқан карханиларға миннәтдарлиқ билдүргүм келиду. Әмгәк коллективлирини алаһидә тәкитлимәкчимән. Бу мукапатлар – көп жиллиқ зәрбидар әмгәкниң мевиси, – дәп тәкитлиди Қазақстан Президенти.
 Дөләт рәһбири конкурс ғалиплирини елан қилип, сәмимий тәбриклиди вә мунасип мукапатларниң уларни буниңдин кейинму утуқлуқ ишләшкә дәвәт қилидиғанлиғиға үмүт билдүрди.
 Ғалипларға мукапатларни Премьер-министр Асқар Мамин тапшурди.