• Асасий мақалилар
• 13 Сәуір, 2022

Хәлиқ киримини ашурушниң әһмийити зор

Дөләт рәһбири Премьер-министрниң орунбасари Ералы Тоғжановни қобул қилди, дәп хәвәрлиди Президентниң мәтбуат хизмити.
Президентқа хәлиқ киримини ашуруш программисини әмәлгә ашуруш җәрияни тоғрилиқ әхбарат берилди. 
Е.Тоғжанов Президентқа маашни көтириш чарисиниң бир миллиондин ошуқ бюджет саһасидики хадимлар вә квазидөләт секториниң санаәт хадимлирини өз ичигә алидиғанлиғини ейтти. Шундақла тиҗарәтчиләргә вәзипиләр жүкләш арқилиқ дөләттин ярдәм алидиған чоң тиҗарәттики 2,8 миллион хадимниң әмгәк тапавитини ашуруш қараштурулған.
Дөләт рәһбиригә тиҗарәтниң тапавитини ашурушқа, шундақла фармацевтика, биотехнология, ІТ технология вә нефть-химия йөнилишидики йеңи санаәт орунлири охшаш ихтисатниң һәрхил саһасидики инвестициялик лайиһиләрни әмәлгә ашуруш арқилиқ йеңи иш орунлирини ечишқа мунасивәтлик Һөкүмәт плани тәвсийә қилинди. 
Шуниң билән биллә Премьер-министрниң орунбасари Е.Тоғжановниң ейтишичә, хәлиқниң иҗтимаий әһвали төвән қатламлирини қоллаш чарә-тәдбирлири қараштурулған. Мәсилән, “Бақытты отбасы” лайиһиси даирисидә көпбалилиқ һәм имканийити чәкләнгән балиларни тәрбийиләватқан 20 миң аял иш билән тәминләнди. Яшларни ишқа орунлаштуруш үчүн “Жастар тәжірибесі” вә “Алғашқы жұмыс орны” лайиһилири әмәлгә ашурулуп, төрт миң айлиқ һесап көрсәткүчигичә грантлар берилиду.
Учришиш ахирида Президент хәлиқниң кириминиң ашурушниң әһмийитиниң зор екәнлигини тәкитләп, Һөкүмәткә бу мәсилини алаһидә назарәттә тутушни тапшурди.