• Әхбаратлар еқими
• 20 Наурыз, 2024

Ат спортиға көңүл бөлиду

Қазақ хәлқи әсли атқа йеқин. Уларниң атқа болған һөрмитиму бөләкчә. Атниң «қулиғида ойнайдиған» қазақ жигит-қизлирини демәмсиз. Расти, уларға йетидиғанлар камдин-кам. Мәсилән, бәш-алтә яшлиқ балилар ат бәйгисигә чүшкинидә, уларниң чәбдәслигигә қайил болисиз.

Мәшүр САСИҚОВ,
«Uiğur avazi»

Заманға бола, илқиға болған көзқараш яки уни күтүш сәл суслашқан болсиму, һазир у пәйдин-пәй әслигә келиватиду. Йеқиндила Бирләшкән Әрәп Әмирликлири Дубай шәһириниң «Мейдан» ипподромида өткән Al Maktum Challenge мусабиқисидә «Кабирхан» тәхәллуслуқ арғимақниң биринчиликни йеңивелиши шуниң испати болса керәк. Әлвәттә, мундақ нәтиҗә қазинишқа нурғун әмгәк сәрип қилинди. У пәқәт Кабирхан билән беваситә ишлигән мутәхәссисләргә аян. Һә, бу болса, қазақниң илқини қандақ күтүп-беқиштин сирт, уни мошундақ узақ мусапилик бәйгиләргә тәйярлаштин убдан хәвири бар екәнлигиниң испати.
Елимиздә ат спортини тәрәққий әткүзүшкә алаһидә диққәт бөлүнүватиду. Шу нәқтәий нәзәрдин җай-җайларда мәхсус илқа нәслини уруқландуруш вә көпәйтиш бойичә илмий-әмәлий иш-тәҗрибиләр әмәлгә ашурулуватиду. Һәтта, чәт әлдин сетивелинғанлириму бар. Умумән, ат спортини тәрәққий әткүзүш үчүн барлиқ шараит яритиливатиду десәк, артуқ әмәс. Мәсилән, йеқинда елимиз пайтәхти Астана шәһиридә җумһурийәтлик «JORYQ» ат спорти федерацияси билән Астана шәһәрлик Миллий вә олимпиадилиқ ат спорти түрлири федерацияси арисида Меморандум имзаланди.
Һөҗҗәткә җумһурийәтлик «JORYQ» ат спорти федерациясиниң президенти Бақытжан Тұрлыбеков Астана шәһәрлик Миллий вә олимпиадилиқ ат спорти түрлири федерациясиниң президенти Ерлан Каналимов қол қойди. 14 тармақтин ибарәт Меморандум икки федерация арисидики һәмкар­лиқни техиму мустәһкәмләп, ат спортини тәрәққий әткүзүш билән аммибаплиғини ашурушни мәхсәт қилиду. Атап ейтсақ, икки тәрәп бирләшкән һалда, ат спортини пайдилиқ тәрәққий әткүзүшкә беғишланған һәрқандақ чарә-тәдбирләрни қоллап-қувәтләп, Қостанай вә Адай илқилириниң нәслини һәм әң дәсләпкиләрдин болуп қолға үгитилгән Ботай мәдәнийитини тәрғип қилиш давамида бирлишип паалийәт елип беришкә келишти.
Икки тәрәп Астана шәһиридики ихчам истираһәт бағлириниң биридә Ботай илқисиға ядикарлиқ орнитиш вә шу әтрапни аватлаштуруш билән пайтәхттә Ботай мәдәнийитиниң мирасгаһини ечишни мәхсәт қиливатиду. Шундақла икки федерация ат спортиға өзлириниң үлүшини қошқан шәхсләрни рәғбәтләндүрүш охшаш чарә-тәдбирләрни өткүзүп, алий билим дәргаһлири билән иш елип бармақчи.
Буниңға қошумчә, қазақ илқисини, униң қазақ турмуши билән мәдәнийитидики орнини тәрғип қилиш йолида Астана шәһиридики театрларда мәхсус сәһнә көрүнүшлириниму уюштурмақчи.