Әхбаратлар еқими
28 Наурыз, 2024

Мәйрәм билән кәлгән хошаллиқлар

Һава райиниң ямғур-йешинлиқ болушиға қаримай, Т.Молдағалиев намидики наһийәлик Мәдәнийәт өйиниң мәйданида Норуз мәйримигә беғишлинип өткән паалийәт қизғин башланди. Әтигәндинла нахша-сазлар яңрап, балилирини йетәкләшкән тәвә турғунлири мәйданни толтурди. Улар наһийәлик карханилар, билим дәргаһлири, мирасгаһлар вә этномәдәнийәт мәркәзлири тәрипидин тәйярланған өйләр билән көргәзмиләрни арилап, спортчиларниң оюнлирини тамашә қилди. Миллий таамлардин дәм тартип, «Алтыбақан» тәпти.

Рашидәм РӘҺМАНОВА,
«Uiğur avazi

Ишиктә шәһиридики Норуз мәйримигә Алмута вилайитиниң һакими Марат Султанғазиев, вилайәт һакиминиң орунбасари Нуржан Қудайбергенов, вилайәтлик мәслиһәт рәиси Талғат Байедилов, AMANAT партияси вилайәтлик шөбисиниң рәиси Қуат Байғоджаев қатнашти.
– Барлиғиңларни күн билән түн тәңләшкән мәйримиңлар билән чин қәлбимдин тәбрикләймән. Президентимиз Қасым-Жомарт Тоқаев: «Бу мәйрәм – тирикчиликкә җан беридиған, һәқиқий тәбиий жил беши. Норуз – йеңилиқ билән йеңилинишниң рәмзи. Шуңлашқиму униң алаһидилигини һәртәрәплимә бейитип, йеңичә нишанлинишимиз керәк. Мундақ қәдәм җәмийәтни техиму уйғунлаштуруп, миллийлигимизни паш қилип, әл бирлигини чиңитиду» дәп кәткинидәк, һәқиқәтәнму, Норуз – хәлиқни миллити вә диний етиқатиға қаримай, бириктүридиған аммивий күн. У хәлиқни ортақ мәхсәт әтрапиға топлап, еғизбирликкә чақириду. Әл роһини көтириду. Шуңлашқиму Алмута вилайитидә, пүткүл Қазақстандикидәк, бийил Норузнамә он күнлүги әмәлгә ашти. Һәр күнгә мустәқил нам берилип, вилайәтниң барлиқ наһийәлиридә униң мәзмуниға лайиқ нурғунлиған ишлар уюштурулди. Нәтиҗидә мәйрәмниң мәнаси вә маһийити кәңийип, мәхсити чоңқурлашти. «Бирлик бар йәрдә, бәрикәт бар» дегәндәк, хәлқимизни бирлиги нәтиҗисидә жилдин-жилға вилайәттә нурғун утуқлар қолға келиватиду. Буниңдин кейин тәвә ихтисадини техиму көтириш – алдимиздики асасий мәхсәт вә вәзипә болуп һесаплиниду. Әнди Алтун Адәмниң вәтини – Әмгәкчиқазақ наһийәси – йеза егилиги, ишләпчиқириш вә бизнес саһалири бойичә вилайәтниң алдинқи қатарлиқ тәвәлиридин болуп һесаплиниду. Жил санап униң мүмкинчиликлири өсүватиду. Ахирқи жиллардила бу йәрдә бирнәччә иҗтимаий вә спорт беналири ишқа қошулди. Пурсәттин пайдилинип, наһийә хәлқигә елимизниң тәрәққиятиға, вилайәтниң гүллинишигә қошуватқан төһписи үчүн зор миннәтдарлиғимни билдүримән! Бүгүнки ямғурға қаримай, бир кишидәк мәйрәмгә қатнашқан кәйпиятиңлар үчүн хурсәнмән! Дөлитимизниң мәртиви егиз, келәчиги ярқин болсун! – деди вилайәт һакими әмгәкчиқазақлиқларға қаритилған тәбрик сөзидә.
Барлиқ түркий хәлиқләр үчүн хасийәтлик болған бу күни Марат Султанғазиев этномәдәнийәт мәркәзлириниң көргәзмилири вә мәхсус тикилгән өйләрни арилап, жиллар бойи бир-бири билән томур тартип кәткән хәлиқләр иттипақлиғини көрди. Андин мәйрәмлик сәпирини Челәк йезисида давамлаштуруп, йеза турғунлирини Норуз мәйрими вә йеңидин қәд көтирип, көпчиликни қучақ йейип қарши алған Жақсылық Үшкемпиров намидики тәнтәрбийә вә сағламлаштуруш комплексиниң ечилиши билән тәбриклиди.

– Бүгүнки мәйрәмлик күндә Челәктә 180 адәмгә молҗаланған, бирнәччә зали вә футбол мәйдани бар заманивий тәнтәрбийә вә сағламлаштуруш комплексиниң ечилиши һәм униңға грек-рим күриши бойичә Дуния чемпиони, хәлқимиздин чиққан дәсләпки Олимпиада чемпиони, Қазақстанниң Әмгәк ветерани Жақсылық Үшкемпировниң наминиң берилиши – чоң утуқ. Ишәнчим камилки, бу тарихий вақиә тәвә спортчилириға үстүн җавапкәрликни жүкләйду. Сәвәви, ушбу йәрдә тәрбийиләнгән балилар униң намиға лайиқ болуши керәк. Ойлаймәнки, тәбиәттә чиниқип өскән яшлар арисидин елимиз абройини көтиридиған нурғун яш спортчилар йетилип чиқиду. Бу комплекс пәқәт Челәк йезисидила әмәс, наһийә спортини риваҗландурушқа мүмкинчиликләр яритиду. Сәвәви, униң асасида Әмгәкчиқазақ наһийәлик 3-балилар вә өсмүрләр спорт мәктиви ечилиду. Демәк, наһийәниң ичидила спорт риқабәтчилиги артип, чин батурларни таллавелиш имканийити туғулиду. ҚҖ Президенти Қасым-Жомарт Кемелулы Тоқаев: «Спортчилиримиз көплигән мусабиқиләрдә топ йерип, әл абройини көтириватиду. Улар өскиләң әвлатқа үлгә-ибрәт болуп, яшларни ярқин ғалибийәткә башлаватиду. Шуңлашқиму спорт һәрдайим мәмликәтниң нәзәридә болиду» дәп ейтти. Дөләт рәһбириниң бу сөзлири аммивий вә кәспий спортни риваҗландуруштики җавапкәрликниң жуқури екәнлигини көрситиду, – деди вилайәт һакими өз нутқида.
Новәттики сөз Жақсылық Үшкемпировниң акиси, І дәриҗилик Барыс ордениниң саһиби, дөләт әрбаби Сәт Тоқпақбаевқа берилип, у комплексниң намини инисиниң исми билән атап, шу арқилиқ Жақсылықниң исмини әбәдийләштүрүш имканийитини яратқан вилайәт рәһбәрлигигә миннәтдарлиғини билдүрүп, келәчәк чемпионларға ақ йол тилиди. Андин комплекс қурулушини жүргүзгән ширкәтниң инженери Әлмухан Орақбай комплексниң мудири Дәурен Рамазановқа бенаниң рәмзлик ачқучини тапшурғандин кейин комплексниң рәмзлик лентиси қийилип, меһманлар униң ичи вә сиртини толуқ арилап, көрүп чиқти.

Қурулуши икки жил давамлашқан Жақсылық Үшкемпиров намидики тәнтәрбийә вә сағламлаштуруш комплексиниң мәйдани 5477,4 квадрат метрни тәшкил қилиду. Униң қурулушиға 2 миллиард 534 миллион тәңгә мәбләғ сәрип қилинди. Комплекста бокс, күрәш оюнлири вә мәшиқлиниш заллири бар. Бу залларда балилар баскетбол, волейбол, гандбол, футбол, еғир атлетика, каратэ, дзюдо, бокс, әркин күрәш, қазақчә күрәш, үстәл тенниси, самбо, бәдиий гимнастика кәби спорт түрлири бойичә ечилған өмәкләрдә спортниң қир-сирини үгиниду. Комплекста пәқәт Челәкниңла әмәс, бәлки хошна йезиларниңму спортқа қизиққан балилири мәшиқлинидиған болиду.
Тәнтәнә давамида вилайәт һакими Челәк тәвәсини җәмийәтлик транспорт билән тәминләш мәхситидә «Шелек-Тұлпар» җавапкәрлиги чәкләнгән йолдашлиғиниң жүргүзгүчилиригә 10 йеңи автобусниң ачқучлирини тапшурди. Ушбу транспортларниң йеза турғунлири, болупму мүмкинчилиги чәкләнгән адәмләр үчүн қолйетимлиқ болушиға диққәт қилинғанлиғини атап өтти. Кейинки үлгидики кәң вә қолайлиқ заманивий автобуслар бир вақитта 30 адәм тошуйду. Йолувчиларниң бехәтәрлигини тәминләш мәхситидә улар транспорт илдамлиғини һәм қозғилиш интервалини назарәттә тутидиған GPS вә электронлуқ билет системилири билән җабдуқланған.
Марат Султанғазиев сәпириниң ахирида мурәккәп җөндәштин өтүватқан Абай намидики вә мурәккәп җөндәшни тәләп қилидиған И.Алтынсарин намидики, А.Молдағулова намидики вә А.Розибақиев намидики оттура мәктәплиридә болди. Билим дәргаһлириниң проблемилири билән тонушуп, шуларға бағлиқ җавапкәр саһа рәһбәрлиригә ениқ тапшурмиларни бәрди.