• Әхбаратлар еқими
• 28 Наурыз, 2024

Мәйрәмгә чақирған мәрасим

Җай-җайлардикидәк, Жил беши – Норуз мәйрими Йәттису вилайитиниң мәркизи – Талдиқорған шәһиридиму дағдуғилиқ нишанланди. Таң сәһәрдинла вилайәт мәркизидә Норуз, Вәтән, ата-ана мавзулириға нахша-сазлар яңрап, һәммини мәйрәмгә чақирғандәк ипадилинип турди. 

Гөһәрбүви ИСМАЙИЛҖАНОВА,
«Uiğur avazi»

 Көпмилләтлик вилайәт хәлқи Норузни жуқури кәйпият билән қарши алди. Шундақ екән, ҚХА әзаси, Жетису вилайәтлик Уйғур этномәдәнийәт мәркизиниң рәиси, Панфилов наһийәлик мәслиһәтниң депутати Турғанҗан Зайитов рәһбәрлигидики Уйғур этномәдәнийәт мәркизи әзалириму бу паалийәткә чоң тәйярлиқлар билән барди. Миллий таамлар, қолһүнәрвәнчилиги нәмунилиридин көргәзмиләр қоюлуп, чоң-кичикни уйғурчә уссулларға тәклип қилишти. Сир әмәски, бир көргән адәмниң дәрру иштийини ачидиған миллий таамлар, болупму көк чөшүрә, самса, самбуса, манта, өпкә-һесипниң тәйярлиниш услуби һәм тарихини билгүси кәлгәнлар аз болмиди. Уйғурниң меһмандостлуғини намайиш қилған мәркәз вәкиллири уларниң соаллириға зерикмәй җавап берип, таамларни утуқлуқ тәйярлашниң йоллири һәққидә ейтип бәрди. 
 Қатар-қатар кигиз өйләр билән бүглүкләрни арилиған Жетису вилайитиниң һакими Бейбит Исабаев, вилайәтлик Ақсақаллар кеңишиниң рәиси Ермек Келемсейит көпчиликни Норуз мәйрими билән тәбрикләп, бәхит вә бәрикәт тилиди. 

Жетису вилайити,
Талдиқорған шәһири