• Әхбаратлар еқими
• 25 Сәуір, 2024

Көпниң көңлидин чиқти

Кейинки жилларда елимиздә киноиндустрияси яхши тәрәққий әтмәктә. Болупму қазақ тилида чүшириливатқан фильмларниң дөләтлик тилниң мәртивисини көтиришкә қошуватқан төһписи зор. Улар кинотеатрларниң кассилириға узун новәткә туруватқан кинохумар яшларниң көңлидин чиқмақта. 

Сабирәм ӘНВӘРОВА, 
«Uiğur avazi»

 Өткән жили хит болған киноларниң бири – «Таптым-ау сені» дәп атилиду. Көпчиликкә «Келінжан» сериали арқилиқ тонулған атақлиқ актриса Дариға Бадықованиң продюсерлиғида чүширилгән у көк экранға чиққан он күнниң ичидила рекорд орнитип, 1,1 миллиард тәңгә топлиди. Шәһәрләрдә яшайдиған аһали атиғи йәр ярған аталмиш фильмни кинотеатрлардин көрүш пурситигә егә болғини билән, йеза турғунлири униң ютубқа чиқишини тақәтсизлик билән күтүшти. 
Шу җүмлидин йеқинда Уйғур наһийәлик Яшлар ресрурслуқ мәркизи қолда бар мүмкинчиликтин пайдилинип, наһийә турғунлирини һәқсиз кино көрүшкә чақирди. Наһийәлик Мәдәнийәт өйидә «Kіno Go» лайиһиси асасида, бу новәт «Таптым-ау сені» фильми көрситилди. 
– «Kіno Go» лайиһиси өткән жилдин бери қолға елинип, буниңғичә яшлиримиз бирмунчә фильмни тамашә қилған еди. Лекин бу қетим кәлгән тамашибинларниң арисида чоңларму нурғун болди. Көрүп турғиниңиздәк, үч йүз орунлуқ зал һәрхил яштики көрәрмәнләргә лиқ толди. Һәтта орун йәтмәй, бәзиләр өрә турса, бәзиләрниң йәргә олтирип кино көрүшигә тоғра кәлди. Демәк, мәзкүр лайиһә яхши нәтиҗә бериватиду десәк, хаталашмаймиз. Униң үстигә, көпчиликниң қизиқишини ойғитиш – таллавелинған киноғиму бағлиқ. Биз, асасән, қазақстанлиқ, рейтинги жуқури, тәрбийәвий әһмийити бар фильмларни қоюп беришкә тиришимиз, – дәйду чарә-тәдбирниң уюштурғучиси болған Яшлар ресурслуқ мәркизиниң мутәхәссиси Гүлшад Муртузаева. 
Шундақла у наһийә турғунлириниң бош вақтини үнүмлүк пайдилиниши һәм яшлиримиз арисидики достлуқ мунасивәтни мустәһкәмләш мәхситидә қолға елинған бу лайиһиниң бийилму давам қилидиғанлиғини тәкитлиди. 

Уйғур наһийәси,
Алмута вилайити