• Әхбаратлар еқими
• 25 Сәуір, 2024

Язғучилар баш қошти

19-үмүт күни Қазақстан Язғучилар иттипақиниң Әдәбиятчилар өйидә өткән жилниң йәкүни бойичә һесават жиғини болуп өтти. Униңға Алмута шәһири вә вилайити һәм башқиму вилайәтләрдә, шундақла хошна Өзбәкстан Җумһурийитидә истиқамәт қиливатқан язғучи-шаирлар қатнашти. Жиғинға Қазақстан Язғучилар иттипақи башқармиси рәисиниң биринчи орунбасари, филология пәнлириниң намзити, язғучи вә журналист Нуржан Қуантайулы риясәтчилик қилди. 
Қазақстан Җумһурийитиниң дөләт гимни орунланғандин кейин, жиғин қатнашқучилири өткән жили дуниядин өткән язғучиларни бир минутлуқ сүкүт сақлап әслиди. Андин, адәттикидәк, қазақ әдәбиятиниң проза, поэзия, драматургия, балилар әдәбияти, әдәбий тәнқит, һөҗҗәтлик проза, сатира вә башқиму саһалири, шундақла қазақстандики рус вә уйғур әдәбиятлири бойичә, җәми он үч доклад оқулди. 
Уйғур әдәбияти бойичә мәзкүр қурларниң муәллипи доклад қилди. У өз сөзидә Дөләт рәһбири Қасым-Жомарт Тоқаевниң қоллап-қувәтлиши билән Қазақстан хәлиқ язғучиси унваниниң әслигә кәлтүрүлүп, униңға бир топ пешқәдәм язғучиларниң, шу җүмлидин тонулған язғучи вә драматург Әхмәтҗан Һашириниңму еришкәнлигини қәйт қилди. Натиқ шундақла Қазақстан әдәбиятиға, шу җүмлидин Қазақстан поэзиясигә салмақлиқ төһписини қошқан пешқәдәм шаир Абдулһәй Розиниң 100 жиллиғиға беғишланған мәрасимниң Қазақстан Язғучилар иттипақиниң Әдәбиятчилар өйидә тәнтәнилик өткәнлиги һәм шаирниң уйғур, қазақ вә рус тиллирида йоруқ көргән топламлириниң тонуштурулғанлиғини тәкитлиди. Шундақла у Қазақстан уйғур әдәбияти тарихиниң ахирқи жиллардики муһим вақиәләрниң бири болған – Қазақстан Язғучилар иттипақи тәрипидин тәсис қилинған «Чинар» әдәбий-иҗтимаий қош айлиқ журналиниң нәшир қилинғанлиғини, униң йоруқ көрүшигә Қазақстан Язғучилар иттипақи башқармисиниң рәиси Мереке Қулкенов һәм Иттипақ йенидики Уйғур әдәбияти кеңишиниң рәиси, шаирә вә алимә Патигүл Мәхсәтованиң алаһидә күч чиқарғанлиғини, буниң Қазақстан һөкүмитиниң, қазақ хәлқиниң уйғур хәлқигә көрситилгән ғәмхорлуғиниң йәнә бир испати, журналниң Қазақстан Язғучилар иттипақининиң мувсүмлүк нәшри сүпитидә йоруқ көрүшиниң елимиздики милләтләрара достлуқни, бирликни, разимәнликни техиму мәстәһкәмләшкә қаритилған йәнә бир башланма екәнлигини алаһидә тәкитлиди.
Натиқ шаирә, филология пәнлириниң намзити, «Алаш» мукапитиниң саһиби Патигүл Мәхсәтованиң «Жүрәк соқуп турғанда», балилар язғучиси Авут Мәсимовниң икки бөлүмдин ибарәт «Ядимдики язмилар», тиҗарәтчи Султанмурат Исрапилов билән яш шаир Абдулҗан Азнибақиев тәрипидин тәйярланған «Һаят қайнимида йүксәлгән иҗат», хәлиқара «Алаш» мукапитиниң саһиби, көрнәклик шаир Җәмшит Розахуновниң икки томлуқ «Мәрвайит тамчилири», Абдуманап Аблизовниң «Илһам чәшмилири», яш шаирлар Шөһрәт Илиевниң «Ана жутум – қанитим», Сабирәм Әнвәрованиң «Мән күткән көкләм», Әхмәтҗан Исрапиловниң «Сарғайған хәтләр» қиссә вә һекайиләр, Иминҗан Тохтияровниң тонулған қазақ шаири Шөмишбай Сариевниң уйғур тилиға тәрҗимә қилинған «Дунияни ашиқ көздә қаратсам...» намлиқ китап вә топламлирини атап көрсәтти. 
Докладчи һазир һәрхил мәзмундики вә дәриҗидики әсәрләрниң, китапларниң һечқандақ бир муһакимисиз өтүшиниң әдәбиятимизниң абройиға дәхил йәткүзүшиниң мүмкин екәнлигини, иккинчидин, Қазақстан Язғучилар иттипақиға әзалиққа өтүш қаидисигә риайә қилиш мәсилисигиму алаһидә диққәт қилишниң зөрүр болуп, буниңға, биринчи новәттә, Язғучилар иттипақи йенидики Уйғур әдәбияти кеңиши әзалириниң вә уларниң рәислириниң разилиғини елишни қәтъий рәсмийләштүрүшниң муһим екәнлигини оттуриға қойди. 
Жиғинниң иккинчи қисмида униң қатнашқучилири һәрхил мәсилиләргә аит өзлириниң пикир-тәклиплири билән сөзгә чиқти. Ахирида иҗадийәттә алаһидә көзгә көрүнгән һәм һәрхил мусабиқиләрдә ғалип чиққан жигирмигә йеқин шаир вә язғучиларға хәлиқара «Алаш» әдәбий мукапити тапшурулди. Шундақла үч қәләм саһиби, шу җүмлидин Қазақстан Язғучилар иттипақиниң әзаси, хәлиқара «Алаш» әдәбий мукапитиниң саһиби, көрнәклик шаир Абдуғопур Қутлуқовқа көпмилләтлик Қазақстан әдәбиятиниң тәрәққиятиға қошқан салмақлиқ төһписи үчүн «Қазақстан Җумһурийитиниң Пәхрий» язғучиси атиғи берилди. Пурсәттин пайдилинип, қазақстанлиқ уйғурлар намидин Абдуғопур акини бу чоң мукапити билән қизғин тәбрикләп, униңға мустәһкәм саламәтлик, узақ өмүр, иҗадиға йеңи утуқ тиләймиз! 

Рәхмәтҗан ЙҮСҮПОВ, 
филология пәнлириниң намзити, Қазақстан Язғучилар 
иттипақиниң әзаси