• Инкас
  • 17 Қыркүйек, 2020

Йеңи лайиһә – йеңи башланма

Сабирәм ӘНВӘРОВА,
«Уйғур авази»

Алмута вилайити бойичә онинчи «Сервислиқ һакимийәт» Уйғур наһийәсидә ечилди. «Жетісу адалдық алаңы» лайиһәси асасида, дөләт хизмитиниң сүпитини яхшилап, хәлиқниң рәқәмлик саватини ашуруш, мәхситидә барлиққа кәлгән йеңи объектниң ечилиш мәрасимиға Қазақстан Җумһурийитиниң Һәмкарлашқан коррупциягә қарши күрәш агентлиғиниң Алмута вилайити бойичә департаменти рәһбириниң биринчи орунбасари Жандос Жумабаев билән Алмута вилайәтлик ветеранлар кеңишиниң рәиси Ермек Келимсейит иштрак қилди.
Умумән, Алмута вилайитидә қолға елинған бу лайиһә дөләт хизмити саһасидики нәтиҗилик башланма сүпитидә баһалинип, хәлиқ үчүн үнүмлүк хизмәт көрсәтмәктә. Йәни, «Сервислиқ һакимийәт» лайиһәси дөләт хизмити түрлирини көрситидиған мәһкимиләрни бир йәргә җәмләш арқилиқ, турғунларға қолайлиқ шараит яритишқа беғишланғанлиғи билән пәриқлиниду. Аддий тилда ейтқанда, бу йәрдә иҗраий орган вәкиллири турғунлар билән йүзму-йүз көрүшүп хизмәт көрсәтсә, бир һөҗҗәт үчүн бир қанчә ишиктә новәттә туридиған аһали әнди бир деризә арқилиқ бар мәсилисини һәл қилалайду. Бурунқидәк у яқ-бу яққа қатнап, артуқ аварә болмайду.
Хәлиқ мәнпийитини көзләйдиған йеңи лайиһәниң йәнә бир алаһидилиги шуки, бу йәрдә бурунқидәк тамлар бөлүп туридиған кабинетлар йоқ. Заманивий тилда буни «Open space” усули, дәп атайду. Йәни, бир йәрдә дөләт хадимлири очуқ кабиниларда олтирип хизмәт көрситиду. Бу лайиһә, биринчидин, турғунларниң вақтини теҗәп, ишини йеникләтсә, иккинчидин, дөләтлик мәһкимидә коррупцияниң орун елишиға йол бәрмәйду. Мана әнди бу хил хизмәт түри Уйғур наһийәсәдиму моҗут. Чонҗа йеза округи һакимийитиниң бенасида орунлашқан йеңи объектниң ишқа қошулуши үчүн бюджеттин 18 миллион тәңгә бөлүнүп, униң он миллиони қурулуш ишлири үчүн ишлитилсә, сәккиз миллиониға заманивий технологияләр билән җиһазлири сетивелинипту. Уйғур наһийәлик «Сервислиқ һакимийәт» имаритидә турғунларға дөләт хизмитиниң қириқ алтә түри бойичә хизмәт көрситилиду. Барлиқ тәләпләргә лайиқ ясилип, йеңидин ишқа қошулған бенани көздин кәчүрүп, һәрбир бөлүмниң хизмити билән айрим-айрим тонушуп чиққан вәкилләр йеңи башланминиң йеңи утуқларға улишишиға тиләкдашлиқ билдүрди.
Сервислиқ һакимийәтниң ечилишидин кейин Жандос Сағындықоғли билән Ермек Әбилмәжиноғли наһийәлик мәркизий ағриқханиға кәлди. Бу йәрдә улар наһийә һакими Шөһрәт Нурахунов билән бирликтә ағриқханиниң әһвали билән йеқиндин тонушуп, баш врач Максот Байчеркешев билән сөһбәттә болди. Вилайәттин кәлгән вәкилләрни дора-дәрмәк вә керәклик медицинилиқ қураллар сақлинидиған амбарға башлиған баш врач бу йәрдики керәк-ярақниң үч айға бемалал йетидиғанлиғини атап көрсәтти. Шундақла «навада, коронавирусниң иккинчи басқучи башланса» дегән ховуп билән алдин-ала тәйярлиқ ишлириниң көрүлүватқанлиғини ейтти. «Яман ейтмай, яхши йоқ» демәкчи, бүгүндә мәркизий ағриқханида оттуздин ошуқ кислород концентратори бар болуп, пәвқуладдә әһвал үчүн икки йүз орунлуқ ятақ тәйярлиниветипту.
Хәйрият, Жандос Жумабаев башлиған топ пәқәт соал-җавап биләнла чәклинип қалмай, наһийә мәркизидики бир қанчә дориханиниң босуғисидин атлап, баһалар билән тонушти. Андин наһийәлик һакимийәттә жиғин ечип, вилайәт бойичә коррупциягә қарши атқурулуватқан ишларни баян қилди.
Бийилқи жилниң сәккиз ейида Алмута вилайити бойичә 122 коррупция әһвалиниң ениқланғанлиғини, «Адал көмек» лайиһәси бойичә, умумән, 139 эфир уюштурулған болса, Уйғур наһийәси һакими аппарати тәрипидин һазирчә пәқәт төрт эфир болғанлиғини қәйт қилди Жандос Жумабаев өз докладида. Шундақла, сөзини Мәктүптики коррупциягә бағлиқ берилгән тапшурмилар билән бағлаштуруп, наһийәдә «Жетісу адалдық алаңы» лайиһәси бойичә атқурулидиған ишларни җанландуруш лазимлиғини әскәртти. Шуниңдин кейин сөз новитини алған Ермек Келимсейит һазирқи қанун бойичә, әгәр қол астидики хадим коррупция билән тутулса, рәһбәрниңму хизмәттин бошитилидиғанлиғини, йәни дөлитимиздә коррупциягә бағлиқ қанунниң жилдин-жилға күчәйтиливатқанлиғини тәкитлиди.
«Бүгүн бизгә, әң биринчи, сәвийәлик байлиқ керәк» дегән ойини йәткүзди өз новитидә минбәргә көтирилгән вилайәтлик мәслиһәтниң депутати Изғарбек Бектурсынов. Натиқ елимиздики дөләтлик сетивелиш тоғрилиқ қанунға көңли толмайдиғанлиғини вә тендерлиқ баһалашқа қарита наразилиқлирини йошурмай ейтип, мошу мәсилини жуқуриға йәткүзүш тоғрилиқ тәкливини ейтти. Андин сөз Илия (Молутов) Бәхтия намидики 3-Чонҗа уйғур оттура мәктивиниң мудири Шерзат Бабахановқа берилди. У билим дәргаһлиридики «Адал ұрпақ» пидаийлар клубиниң иш-паалийитигә тохтилип, яш әвлатни адиллиққа тәрбийиләшниң мәктәп босуғисидин башлинидиғанлиғини сөз қилди.
Наһийәлик мәһкимә вә бөлүм рәһбәрлири, йеза округлири һакимлири билән мәктәп мудирлириниң қатнишишида өткән жиғинда орунлуқ пикир ейтилип, муһим мәсилиләр муһакимә қилинди. Актив жиғинидин кейин вилайәттин кәлгән вәкилләр «ОТАН Грин Фуд» қуш фабрикисида болуп, бәш йүз адәмни иш билән тәминлигән ширкәтниң паалийити билән йеқиндин тонушти. Бу йәрдә фабрика рәһбәрлири газ киргүзүш мәсилиси билән йәр мәсилисини тилға алди. Узун сөзниң қисқиси, бир күнгә созулған иш-сәпиридә наһийәниң утуқлири билән камчилиқлирини жипқа тизип қайтқан вәкилләр ейтилған тәклип-пикирләрниң етиварсиз қалмайдиғанлиғиға ишәндүрди.
Мәлумки, Дөләт рәһбири «Қазақстан йеңи реаллиқта: иш-һәрикәт вақти» намлиқ Мәктүбидә дөләтлик хизмәт вә парихорлуқ, рәқәмләндүрүш һәққидә алаһидә тохтилип, бирқатар тапшурмиларни жүклигән еди. Болупму, Президент дөләт ихтисади қил үстидә турған пәйттә, парихорлуққа йол қоймаслиқ үчүн җиддий иш жүргүзүшимиз лазимлиғини тәкитлиди.
Хулләс, «Сервислиқ һакимийәт» лайиһәсиму дөләт хизмити сүпитини яхшилап, рәқәмләндүрүшкә көчүп, коррупцияниң алдини елишқа қаритилған ишларниң бир көрүнүшидур. Уни шундақла «Хәлиқ авазиға қулақ салидиған дөләт» йолида ясиливатқан муһим бир қәдәм десәкму болиду.

42 рет

көрсетілді

0

пікір
Алдыңғы мақала 35-өй чаринлиқ аниға буйриди
Келесі мақала Бағдин бәрикәт тапқан бағвән

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

28 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы