• Инкас
• 11 Қаңтар, 2024

Әтә ким болидиғинимиз муһим

«Биз милләт мәнпийитини әстә тутуп, конструктив һәм салмақлиқ ташқи сәясәтни давамлаштуримиз. 2024-жили елимиздә бирқатар кәңдаирилик саммит, форумлар өтиду. Қазақстан бирнәччә абройлуқ хәлиқара тәшкилатқа, җүмлидин ШҺТ, КБТШТ, АӨҺИЧБК, Түркий дөләтләр тәшкилатиға, Арални қутулдуруш хәлиқара фондиға, Озуқ-түлүк бехәтәрлиги бойичә ислам тәшкилатиға рәислик қилиду.
 Дуниявий көчмәнләр оюнини өткүзүшму елимиз үчүн муһим вақиә болмақчи. Чоң мусабиқә миллий спорт билән сағлам һаят тәризини тәшвиқ қилиш тәрипидинму, Улуқ даладики көчмәнләр цивилизациясиниң мирасхори һесаплинидиған қериндаш хәлиқләрниң мәдәний-гуманитарлиқ алақисини ашуруш турғусидинму әһмийәтлик екәнлиги сөзсиз», – деди Президент Қасым-Жомарт Тоқаев «Egemen Qazaqstan» гезитиға бәргән сөһбитидә.
 Умумән, шәхсләрниң һаятиға нәзәр ағдурсақ, биз өткән күнгә көз ташлап, илгири байқалмиған һаҗәт болған тәрәпләрни чоңқур көрүшкә имканийәт алимиз. Мошундақ әскә елишлар хәлиқ қәлбини нурландуруп, адаләтлик һис-туйғусини, миллий өзлүк сәвийәсини кәңәйтиду. Бу турғудин Президент: «Әл тарихида алаһидә орни бар шәхсләргә һөрмәт көрситиш әнъәниси елимизниң умуммиллий бирпүтүнлүгини күчәйтишкә тәсир қилиду. Бийил атақлиқ алим Қаныш Сәтбаевниң туғулғиниға — 125, атақлиқ батурлар Сағадат Нурмағамбетов билән Рахимжан Қошқарбаевниң туғулғиниға 100 толиду. Шуниң билән биллә, тарихчиларниң тәхмини, бойичә Жоши улуси һулиниң селинғиниға – 800 жил. Дөлитимиз томуриниң чоңқур екәнлигини намайиш қилидиған мошу сәнәгә мунасивәтлик кәңдаирлик тәтқиқатлар қолға елинди.
 Бийил Қазақстан тарихиниң көптомлуғини тәйярлаш ишлирини аяқлаштуримиз. Бу – өзимиздин 200дин ошуқ, чәт әлдин 60қа йеқин мутәхәссис җәлип қилинип, әмәлгә ашурулуватқан чоң иш» – дәп алаһидә тәкитлиди.
 Әлвәттә, мошундақ атақлиқ шәхсләр билән Қазақстан тарихиниң көптомлуғи җәмийәтниң мәнивий һаятиниң нурғун саһалирида ениқ көрүнүшкә башлайду. Буниң өзи пүткүл дуниявий мәдәнийәткә күчлүк тәсир қилиду дегән сөз. 
Сөһбәттә «Январь вақиәсигә» сәвәп болған шәртләрму ейтилған екән. Буни һазир иккиқирлиқ пикир пәйда қиливатқан мәсилигә қоюлған чекит, дәп ейтишқа болиду.
 «Бүгүнки күндә қазақниң миллий сәвийәси өзгәрди. Тирикчилиги, мәхсити алаһидә. Һазирқи үмүт – оқуған яшлиримизда, «мән қазақ яшлириға ишинимән», – дәйду Дөләт рәһбири. 
 Хәлиқтә адәмгәрчилик һиссияти күчийип, яманлиқниң һәммиси яхшилиққа айланса дәп тиләймиз. Бала қанчилик пухта билим елип, яхши муһитта жүрсиму – ана қәлбидин алған миллий тәрбийила уни адәмгәрчиликкә, инсан дәриҗисигә көтириду.
 Президент өз сөзидә зорлуқ-зомбилиқ тоғрилиқ тәкитләп өтти. Турмуштики зорлуқ-зомбилиққа мунасивәтлик җазани күчәйтишни толуқ қоллаймән. Бу бүгүнки күнниң муһим мәсилилириниң бири болуп турған мавзу. Жуқурида ейтқинимдәк, буниң йоли – миллий тәрбийә. Адәмни инсанпәрвәрликкә елип келидиған – аял. Йәни этнографлар ейтқинидәк, тәрбийини ана билән ата болушқа тәйярлаштин башлишимиз лазим. 
 Дунияниң күн санап өзгириватқан заманида яшларниң йеңи технологияләрни егиләп, билимлик әвлатниң роли ашидиғанлиғи ейтилған. Җәмийәттики нурғун мәсилиләрни өз ичигә алған бу сөһбәтниң хәлиққә беридиған пайдилиқ тәрәплири нурғун. 
 Бийил әтиязда өткән Миллий қурултайда Қасым-Жомарт Кемелоғли: «Миллий қурултай идеология саһасидики мәсилиләрни, милләтниң йеңи сүпитини қелиплаштуруш ишини, җәмийәтлик қәдрийәтләр системисини йеңилаш мәсилисини муһакимә қилидиған бәс-муназирә мәйданиға айланди», – дәп тәкитлиди.
 Дихан Қамзабекулы жүргүзгән бу сөһбәттә келәчәккә қаритилған ихтисадий, сәясий ойлар чоңқур тәһлил қилинип, һәртәрәплимә ейтилған. 

 Қасымхан БЕГМАНОВ, 
Қазақстан Язғучилар иттипақи  рәисиниң орунбасари