• Инкас
• 11 Қаңтар, 2024

Келәчәккә болған ишәнчә

Мана, йеңи жил кириши билән елимиздә йүз бәргән әһмийәтлик вақиәләрниң бири – Дөләт рәһбириниң «Eqemen Qazaqstan» гезитиға бәргән сөһбити болди. Президент Қасым-Жомарт Тоқаев очуқ сөһбәт давамида җәмийитимизниң һәммә саһалиридики җиддий мәсилиләрниң барлиғи һәққидә кәң вә тәпсилий тохтилип өтти. 
 
Президентниң бу сөһбитини экспертлар һазир программилиқ мақалә дәп баһалимақта. Бу һәқиқәтәнму шундақ. Байқиғинимиз, Дөләт рәһбири мәмликитимизниң һаят-нәпәсини толуқ билидекән һәм уларни чүшинип, һәл қилишниң ениқ йоллириға кәң тохталди. Бүгүнкидәк хәлиқара җиддий әһвалда елимизниң ички вә ташқи сәяситиниң асасий йөнилишлири пәқәт дөләт мәнпийити турғусидин ениқлинидиғанлиғини кесип ейтти. Болупму ташқи сәясәттики һәрқандақ мәсилиләр бойичә ейтқан пикирлиридә униң дипломатиялик тәҗрибисиниң моллиғи вә дунияда өзиниң шәхсий абройиниң жуқури екәнлиги көрүнүп туриду. Буниңға бийил елимиздә өтидиған чоң хәлиқара саммитлар, форумлар мисал болалайду. Президентниң ейтишичә, һәрқандақ мәсилини зиддийәтләр мәйданида әмәс, музакириләр, диалоглар мәйданида һәл қилиш лазим. Алий дәриҗидики диалоглар болмиса һәрқандақ дөләтниң башқа мәмликәтләр билән өзара пайдилиқ мунасивәтләрни орнитиши наһайити қийин. Қазақстан өзиниң течлиқпәрвәр ташқи сәясити билән дайим мошундақ ишларниң тәшәббускари болуп келиватиду. Буни пүткүл дуния етирап қилиду.
 Әлвәттә, Президент ички сәясәт мәсилилиригиму алаһидә диққәт бөлди. Болупму, униң тәрәққий етишни халисақ, өткән күнгә рәнҗимәй, шу дәвирдә кәткән хаталиқлардин савақ елип, хуласә чиқирип, алға илгириләшниң муһим екәнлиги тоғрилиқ пикри җәмийәттә қизғин қоллашқа егә болди. Келәчәкни яшларсиз тәсәввур қилалмаймиз, әлвәттә. Шуңлашқа Президент қазақстанлиқ яшларға, уларниң билимигә, бәрпакарлиғиға ишинидиғанлиғини алаһидә тәкитлиди. Яшларниң билим елиши, тәрәққий етиши, ишлиши үчүн елимиздә барлиқ имканийәтләр бар екәнлиги һәммигә аян.
 Президент Миллий қурултайниң әһмийитини алаһидә тәкитләп өтти. Дөләт рәһбириниң беваситә тәшәббуси билән тәшкил қилинған Миллий қурултай җәмийитимиздә муһим роль ойнашқа башлиди. Униң тәркивидә елимизгә тонулған, өзлириниң пикир-мәвқәси ениқ шәхсләр, әрбаплар бар. Һазир Миллий қурултайниң новәттики жиғининиң уюштуруш, уни мәзмун җәһәттин толуқтуруш мәсилилири муһакимә қилиниватиду. Президент әнди Миллий қурултайни әтиязда, йәни Норуз мәйрими һарписида өткүзүшни тәклип қилди. Демәк, мәмликитимизниң сәясий, иҗтимаий-ихтисадий тәрәқққиятиниң йөнилишлирини қурултайда чоңқур тәһлил қилиш тоғрилиқ тәшәббусни алға сүрди. Дөләт рәһбириниң Миллий қурултайни Норуз мәйрими һарписида өткүзүшни тәклип қилишиму тәсадипи әмәс. Бу һәққидә Қасым-Жомарт Кемелоғли: «Бу мәйрәм – тиркичиликни жанландуридиған тәбиий жил беши.
  Норуз – йеңилаш вә йеңилинишниң рәмзи. Шуңлашқа мошу мәйримимизниң мәзмунини бейитип, уни имканқәдәр пәриқләндүрүп, йеңичә нишанлишимиз лазим. Бу қәдәм жәмийәтни уюштуруп, миллий бирпүтүнлигимизни ениқлап, хәлиқ бирлигини күчәйтишкә тәсир қилиду дәп ишинимән», дәп бу мәйрәминиң әһмийитини алаһидә тәкитлиди. Һәқиқәтәнму,  Норуз – әлгә шатлиқ-шадиманлиқ, яхшилиқ-изгүлүк, молчилиқ-паравәнлик һәдийә қилидиған улуқ мәйрәм. Уни әждатлиримиз әсирләр давамида нишанлап келиватиду. Әйнә шундақ улуқ мәйрәм һарписида өтидиған Миллий қурултай яхшилиқниң, изгүлүкниң, тәрәққиятниң җарчиси болидиғиниға ишәнчим камил.
 Жуқурида ейтқинимдәк, Президентниң елимизниң әң чоң, йетәкчи  гезитиға бәргән сөһбитини программилиқ мақалә дәп тәкитләш орунлуқ. Очуқ вә сәмимий рәвиштә ейтилған соал-җаваплар бизниң келәчәккә болған ишәнчимизни ашурғанлиғи сөзсиз.
 Шаһимәрдан НУРУМОВ, 
     Қазақстан Жумһурийити Президенти йенидики Миллий қурултай вә ҚХА кеңишиниң әзаси