• Инкас
• 11 Қаңтар, 2024

Чоңқур қанаәт һасил қилдуқ

Биз, қазақстанлиқлар, бу қетимму  Президентимиз  Қасым-Жомарт Тоқаевниң «Egemen Qazaqstan» гезитиға бәргән сөһбитини зор қизиқиш билән оқуп чиқтуқ. Чүнки униңда еқимдики вә истиқбалдики стратегиялик  тәрәққият йөнилишлири ипадилинип, һаятий зөрүр мәсилиләр өз ипадисини тапқан.
 Биринчи новәттә шуни тәкитләш керәкки, сөһбәттә ихтисадий-иҗтимаий мәсилиләргә алаһидә көңүл бөлүнгән. Көпчиликниң Январь вақиәсидин кейин келәчәккә гуман билән қариғанлиғи сир әмәс. Болупму коммуналлиқ хизмәтләр, хаңларда ишләватқан хадимлар бехәтәрлиги, ана вә бала саламәтлигини сақлаш проблемилириниң һәммини ойландуруп қойғанлиғи һәқиқәт. 
Президент мана мошу хилдики вә башқиму  барлиқ  қазақстанлиқларниң гуманини қозғиған соалларға алаһидә тохтилип, сәясий реформиларни жүргүзүшниң нәқәдәр муһимлиғини ечип ейтип бәрди. 
 Дөләт рәһбири шундақла елимизниң сиртқи  сәясити һәм униңдики өзгиришләргә, сиртқи сәясий  аренида йүз бериватқан әһваллар, Оттура Азия әллириниң дуния әһлини өзигә җәлип қиливатқанлиғи,  болупму Қазақстанниң  чәт әлләр билән мунасивитини  яхшилаштики роли һәққидә тохталди. Сөһбәт җәриянидики Қасым-Жомарт Тоқаев достлуқ, милләтләрара разимәнлик уни сақлаштики мәхсәт-пикирлири һәммини қайил қилди. Чүнки бизниң көпмилләтлик  елимиздә хәлиқләр достлуғи һәқиқәтәнму һәммидин әла. Болупму  чегарилиқ һесапланған Панфилов наһийәсидә 40қа йеқин милләт билән еләт бир чаңирақ астида худди бир аилиниң балилиридәк иҗил-инақ яшаватимиз. Тәвәдә үч этномәдәнийәт мәркизи паалийәт елип бариду. Уйғур, туңган, славян мәдәнийәт мәркәзлири билән «Қазақ тили» җәмийәтлик бирләшмисиниң алға қойған мәхсити — достлуғи ярашқан өлкидә  милләтләрара разимәнликни сақлап, уни әвлаттин-әвлатқа қалдуруштин ибарәттур.                                                           
Алена  КОЛЯДА,      
 Панфилов наһийәлик Славян этномәдәнийәт мәркизиниң рәиси 
Жетысу   вилайити