• Нәшрият төһписи
• 10 Наурыз, 2021

«Жуттики мәрипәт чириғи»

Мәшүр САСИҚОВ,
«Уйғур авази»

Йеқинда «Мир» нәшриятидин Талғир наһийәсиниң Туздыбастав  йезисидики оттура мәктивидә уйғур синиплириниң ечилғиниға 60 жил толуши мунасивити билән ушбу билим дәргаһиниң пешқәдәм устази Абдуреһим Муһәмәтовниң қәлимигә мәнсүп «Жуттики мәрипәт чириғи» намлиқ китап йоруқ көрди.
Униңда муәллип асасән мәктәпниң дәсләпки күнлиридин бүгүнгә қәдәр болған тарихиға тәпсилий тохталған һалда, шу пәйтләрдики муәллим-устазларниң тартқан җапалиқ әмгиги билән қол йәткүзгән утуқлиридин учур бериду. Болупму пүткүл аңлиқ һаятини бала тәрбийисигә беғишлиған пешқәдәм устазларниң тиришчанлиғи вә уларниң ушбу мәктәптә уйғур синиплирини сақлап қелиш йолида төккән тәриниң бәдилигә һеликәм бираз қаракөзлиримиз ана тилида билим елишқа муйәссәр болуватқанлиғи алаһидә тәкитлиниду. Шундақла муәллип мәктәп учумкарлири арисидин йетилип чиққан салаһийәтлик мутәхәссисләрни тонуштурғач, уларниң җәмийәт тәрәққиятиға қошуватқан һәртәрәплимилик төһписини көпчиликкә йәткүзүшкә тиришқан. Мәсилән, илим-пән саһасида егиз чоққиларни егилигән хәлқимизниң мунәввәр пәрзәнди, мәрһум Әнвәр Һаҗиев кәби пәқәт миллитиниң ғеми билән яшиған бир топ оғланлиримизниң тәрҗимиһалидин ташқири, улар тоғрилиқ башқиларниң әслимә-хатирилириму орун алған.
Китапта шундақла жут-җамаәтчилик хизмитидиму паалийәтчанлиқ көрситиватқан туздыбаставлиқларниң исим-нәсиби тилға елиниду. Ениғирақ ейтсақ, уларниң жутниң инақлиғини, миллий урпи-адәтлиримиз билән  әнъәнилиримизни сақлашта атқуруватқан ишлири вә тапқинини әл билән тәң бөлүшүшкә адәтләнгән сахавәтлик инсанларниң өмлүги баян қилиниду.