• Нәшрият төһписи
• 15 Ақпан, 2024

Тоғрақ дәрди – ортақ дәрт

Йәнә бир язғучимиз Вильям Молотовму өз мухлислирини «Қириқниң қирлири» намлиқ йеңи топлими билән хошал қилди. Мавзусиға қариғанда сәл сирлиқ, иғва арилаш һәзили бар көрүниду. 
Амма биз билидиған Вильям мошу кәмгичә өз оқурмәнлирини омулдурған әмәс. Кәңдаирилик, тәпәккүри чоңқур, иҗаткарға хас көзқариши, муддиаси шәкилләнгән әдип. Нәзмий әсәрлири, балиларға беғишланған әсәр- әтиқилири, тәрҗимә әсәрлириму өзигә бирдин җәлип қилиш иқтидариға егә. 
Һәҗими он йәттә басма тавақ көләмлик бу топлам шаирниң қайнақ иҗат үстидә екәнлигидин дерәк бәрсә, бу қетимда топламда ғәзәл вә балладиларға орун берилиши оқурмәнлири үчүн йеңилиқ. Һазир көпчилик шаирлар аруз вә бармақ вәзнигә бағлинип қеливатқанда, пикир вә мүмкинчиликлири чәклинип қелишиму еһтимал. Әнди ғәзәл жанри болса, һәрқандақ йетүк әдип үчүн паянсиз кәңлик. Баллада болса, шеирийәт билән һекайивәнликниң мәлум бир вақиәни баян қилишта уйқишип кәткән шеир. 
Һәр һалда Вильямниң ахирқи жиллири йеңилиққа интилиши, издиниши мошу топламда өз әксини тапти дәп ейтишқа асас бар. Тәрҗимиму бүгүнки яш иҗаткарларниң иҗадий өсүшигә түрткә болуп келиватиду. Җүмлидин, Абдулҗан Азнибақиев билән Вильям Молотовниң тәрҗимилири бәзән оригиналдинму күчлүгирәк. Шеирийәттики тәрҗимини риқабәт дейишимизму бекар әмәс. Уларниң әсәрлириму башқа тилларға тәрҗимә қилиниватиду. Топламдики йәнә бир чоң йеңилиқ-муәллип шеирлириниң рус тилидики тәрҗимисиниңму қатар елан қилиниши. Йәни Вильямниң бир түркүм шеирлири тәрҗиманлар Вильям Садиқов, Хәмит Һәмраев, Надежда Чернова тәрипидин жуқури маһарәт билән русчә яңрапту. Бу усул илгири бирқатар уйғур язғучилириниң топламлирида қолланған. Нәзимдин у бу тәҗрибиниң пайдилиниши шаир иҗадини техиму чоңқур чүшинишкә вә уни тәшвиқат қилишқа пайдиси мол.
Мәзкүр топламдики йәнә бир рәмзлик пәйт, у «Тоғрақ нечүн бағриңда қан дағ» намлиқ миллитимизниң автобиографиялик шеири билән башлинипту. Һәрқандақ иҗаткар қолиға қәләм елиштин илгири «Мошу язғинимдин әлгә нәп барму?» дәп ойлиши шәрт. Бүгүнки яш әдиплиримизниң бәт елиши өзгичә. Пәқәт әдәбияттила әмәс. Демәк, бүгүнки оқурмән «Тоғрақ бағридики қан билән дағниң» сәвәвини чүшинишкә қабил дегән сөз. Шу чағда «Тоғрақ җәзмән сақийиду».