• Нәшрият төһписи
• 11 Қаңтар, 2024

Мәйрәмгә төһпә

Әхмәтҗан ИСРАПИЛОВ,
«Uiğur avazi»

Йеңи жил һарписида язғучи вә журналист Нурдөләт Мурадилов өз оқурмәнлиригә «Диянәт» намлиқ йеңи топлимини һәдийә қилди. Пүткүл һаяти тирикчиликниң нәқ қайнимида өтүватқан әдип һекайилириниң сюжети бир қаримаққа аддий көрүнгини билән, мәзмуниниң чоңқурлуғи, вақиәләрниң һаятийлиғи билән пәриқлинип туриду.
Һәрқандақ оқурмән бирәр әсәрни оқуш алдида униң муәллипи һәққидә мәлумат алғуси келиду. Шундиму, бәрибирла, иҗаткарға әсәрлириниң сүпитигә қарап баһа бериду. Бизму шу. Амма жирақ-йеқиндики оқурмәнләргә нисбәтән, бүгүнки күндики санақлиқ иҗаткарларни беваситә тонуймиз вә уларниң немигә қадир екәнлигиниму яхши билимиз. Нурдөләт Мурадилов кәспий журналист. Биздә өзара “Журналист язғучи болуши мүмкин. Амма язғучи журналист болалмайду” дегән гәп бар. Әлвәттә, бу пикирдә мәлум һәқиқәт болсиму, уни үзүл-кесил хуласә дәп ейтиштин жирақмиз. Чүнки бу һәркимниң қабилийитигә бағлиқ мәсилә. Һәр һалда журналистика әдәбиятқа нисбәтән өз жүки, мәхсити бөләк саһа.
Н.Мурадиловму журналистика саһасиниң пешивалириниң биридур. Иш-паалийитини наһийәлик “Әмгәк туғи” гезитида башлиған әдип чоң-кичик проблемилиқ мақалилири, очерклири, ейтмақчи (бу әдәбий жанрға ятиду), арқилиқ оқурмәнләр қәлбигә йол тапти. Андин узақ жил “Қазақстан” телевидениесиниң “Алитағ” уйғурчә көрситишләр программисида у өзиниң немигә қадир екәнлигиниму испатлиди. Журналист тәйярлиған көрситишләрдин әл көңли у ичти. Пенсиягә чиққандин кейинму теч ятмай, Түрксиб вәі Жетису наһийәлири мәдәнийәт мәркизини он жилдин ошуқ башқурди. Һазир у “Қарису” мәһәллиси ақсақаллар кеңишиниң рәиси.
Униң иҗадиму әшундақла кәң даиридә. Әдипниң қәлимигә мәнсүп Қаратуруқ йезисиниң 100 жиллиғиға беғишланған “Достлуқ жути” Қарису мәһәллисиниң тарихи һәққидики “Өмлүги ярашқан жут” һөҗҗәтлик повестьлири билән “Яхшилиқлар үчүн яралған” очерк вә һекайиләр топламлири оқурмән әһли җәһәттин қизғин қобул қилинди.
Новәттики “Диянәт” әсәриму жут көңлидин чиқишиға ишәнчимиз камил. Чүнки әдипниң қәһриманлири әйнә шу оқурмәнлириниң һаяти, тәғдири һәққидә. Икки қисимдин ибарәт көләмлик бу әмгәк уйғур нәшриятчилиғиниңму утуғи екәнлиги талашсиз.