• Нәшрият төһписи
• 08 Маусым, 2023

«Ашиғимән иҗатниң»

    Яркәнт — онлиған әмгәк мәрданилири, сәнъәткар-мәрипәтчиләр, шаир-язғучилар йетилип чиққан даңлиқ шәхсләр макани. Буниңға өтмүш билән бүгүнки дәвир рошән гува. Улуқ әҗдатларниң шанлиқ йолини, изини давамлаштуруп, бүйүк арзу-арманлар шам-чириғини өчәрмәй келиватқан яшлар бу тәвәдиму бар, йетәрлик. Биз шуниңға бәк хошал.                 Рошәнгүл Асимова. Бу исим фейсбук, Инстаграммни пайдиланғучиларға мәлум болғини билән, әдәбият мухлислириға кәң тонуш әмәс. У яқ билән мәнму торбәтләр арқилиқ тонушқанмән. Елан қилинған шеирлирини бир жилдин ошуқ вақит күзитип, өз мәслиһәтлиримни берип кәлгиним бар. Ениғирағи, Рошәнгүлниң дәсләпки шеирлирини оқуғинимда, иҗадиға бирдинла ашиқ болдум. Сәмимий, назук қәлбтин вуҗутқа кәлгән атәш мисралар. Сөзлири деңиз тегидики марҗанни әслитиду, ейтмақчи болған ой-пикирлири рошән, лирикиға толуп-ташқан. Қолуңдин йетиләп, гөзәллик макани — әдәбият бостанлиғиға башлап кәткинини өзәңму туймай қалисән. Бу тәрипини тәрипләшни иҗадийәтни чин сөйидиған, көйүнидиған китапхан әһли әнчисигә қалдурсам әқилгә мувапиқ болса керәк, дәп ойлаймән. Қисқиси, әдәбиятимизға йәнә бир шаирәниң өзигә хас авази билән кирип келиши — биз үчүн йеңилиқ, чоң утуқ екәнлигидә шәк-шүбһә йоқ.     
 Йеқинда Панфилов наһийәлик мәслиһәтниң депутати, Жетису вилайәтлик Уйғур этномәдәнийәт мәркизиниң рәиси, әдәбият, миллий мәдәнийитимизниң җанкөйәри Турғанҗан Зайитовниң һамийлиғида Рошәнгүл Қәйсәрқизиниң «Ашиғимән иҗатниң» намлиқ тунҗа шеирлар топлими йоруқ көрди. Топлам әдәбиятни сөйидиған, қәләм саһиблириға көйүнидиған кәң оқурмән аммисиға молҗаланған.
                     Иминҗан ТОХТИЯРОВ,
 шаир