• Мәрипәт мәсилилиригә беғишланған мәхсус сәһипә
• 25 Сәуір, 2024

«Тик-ток»:пайдисиму, зийиниму йоқ

Яхши муәллим йеңи технологияләрни пайдиланған һалда, шагиртлириға сүпәтлик билим, аңлиқ тәрбийә беришкә интилиду. Мәлумки, бүгүнки муәллимниң асасий вәзиписи — оқуғучини өз дәрисигә қизиқтуруп, һәмнәпәс болалишида. Йошуридиғини йоқ, бүгүн синипта өзиниңкини раст дәйдиған, телефонниң «қулиғида» ойнайдиған, «китапқа қарап яз, орнуңда теч олтар» дегән гәпни қобул қилмайдиған, бир орунда узақ олтиралмайдиған, узақ йезиштин, узақ сөздин оңайла һерип қалидиған, йәни дайим йеңилиқни, һәрхиллиқни тәләп қилидиған, «альфа», «зетта» балилиримиз олтириду. 
Башланғуч синип муәллими сүпитидә ейтарим, һазирқи балиларни 45 минут йезиш, сөзләш билән өз пәнимизгә қизиқтуралмаймиз һәм оқуғучиниң билим елишқа болған иштияқини ойғиталмаймиз. Сәвәви, һазир балиға керәк нәрсиниң һәммиси Интернеттин тепилиду. Бу әһвалда немә қилишимиз керәк? Алди билән биз, муәллимләр, синипта олтарған оттуз балиниң һәрбирини тонушимиз керәк. Униң исим-нәсибини, һәтта кимниң балиси екәнлигинила әмәс, униң қизиқишини, немини яхши көрүп, немини өч көридиғанлиғини, һәтта қандақ рәңни яхши көридиғининиму билишимиз һаҗәт. Муәллимләрниң бесим көпчилиги «немә мән, психологму? Мениң вәзипәм, билим бериш, халас!», дейиши мүмкин. Әгәр сиз оқуғучиңизни бир қетим һәммә яқтин тонуп, биливалсиңиз, уни өз пәниңизгә қизиқтуралайсиз вә билим елишқа дегән қизиқишини ашуралайсиз. 
Бүгүнки балиға немә қизиқ? Улар немә көрүватиду? Тиңшаватқан нахшиси немә һәққидә? Мәсилән, мән «Тик-ток» торбетини анчила яқтуруп кәтмәймән. Бирақ, заман тәрәққиятидин сиртта қалғум кәлмигәнликтин, униңға тиркиливалдим. Сәвәви, мән оқутуватқан оқуғучилар «альфа» балилар. Оқуғучилиримға «тик-токтин» қизиқ һәм тәрбийәвий әһмийити бар трендларни елип келип, улар билән бәс-муназиригә чүшимән. Өзәм чүшәнмигән нәрсиләрни улардин сораймән. Әгәр мән «немә бу, көрүватқиниңлар? «Тик-токтин» көрүватқиниңларниң силәргә һеч пайдиси йоқ!», дәп вайсайдиған болсам, балиниң муәллимгә дегән ишәнчиси йоқайду һәм аңлиған яки көргән йеңилиғи билән һечқачан бөлүшмәйду. Ақивәттә, оқуғучи һәм муәллим икки йөнилишкә қарап қалиду. Шуңлашқа һәрбир балини мәйли у үчкә, мәйли бәшкә оқусун, уни чин дилимиздин яхши көрүп, тонуп билгәндила, биз билимлик шәхсни тәрбийиләп чиқалаймиз һәм билим кемисини долқунлиған деңизда тутуп қелип, уни тоғра йөнилиштә башқуридиған болимиз.

Бүвихеличәм ИМИНОВА, 
А.Розибақиев намидики 
153-мәктәп-гимназияниң
 башланғуч синип муәллими

Алмута шәһири