• Спорт
• 17 Тамыз, 2012

Йәттинчи алтунғиму йәттуқ!

Лондон Олимпиадисида  Қазақстан йәттә алтун, бир күмүч, бәш бронза медаль йеңивалди Лондонниң Олимпиада стадионида ХХХ язлиқ Олимпиада оюнлирини йепиш мәрасими болуп өтти. Униңда Muse, Spіce Gіrls, Beydy Eye  охшаш атақлиқ топлар, гитаричи Брайан Мэй вә башқилар өз һүнирини көрсәтти. Чарә-тәдбирни Оюнларға қатнашқан спортчиларниң паради ачти. Дәсләп Эмили Санд «Read All About Іt» хитини иҗра қилди. Андин кейин стадионда 108 автомобиль пәйда болди.   Мәрасимниң ахири Британия араллириниң тарихиға улашти. Әнъәнә бойичә программиға әрләр марафонида ғалип чиққанларни мукапатлаш мәрасими киргүзүлди. Андин кейин Лондон шәһириниң мэри Борис Джонсон Олимпиада байриғини Хәлиқара олимпиада комитетиниң президенти Жакк Роггеға бәрди, у болса байрақни новәттики язлиқ Оюнларниң пайтәхти Рио-де-Жанейро шәһириниң һакими Эдуардо Паэсқа тапшурди. Лондонда болуп өткән ХХХ язлиқ Олимпиада оюнлири тоғрилиқ дәсләпки материалларни қанчилик йеқимлиқ хәвәрләрдин башлиған болсақ, ахирқи материалниму шундақ роһта аяқлаштуруватимиз. Чүнки оюнларниң ахирқи күни, йәни 12-августта, Қазақстан талланма командиси һәрхил дәриҗидики үч медальға сазавәр болди. Талланма командимизниң капитани боксчи Серик Сәпиев 69 килограммғичә болған салмақ дәриҗисидә ринг ғоҗайини Фрэдди Эванс үстидин ғалип чиқип, Олимпиада чемпиони аталди. 81 килограммғичә болған салмақ дәриҗисидә мусабиқиға чүшкән йәнә бир боксчимиз Әдилбек Ниязимбетов күмүч медальни йеңивалди. Ақжүрек Танатаров әркин күрәштә 66 килограммғичә болған салмақ дәриҗисидә үчинчи орунни егиләп, бронза медалиға сазавәр болди. Шундақ қилип, Олимпиада йәкүни бойичә Қазақстан йәттә алтун, бир күмүч, бәш бронза, җәми 13 медаль йеңивелип, нарәсмий командилиқ һесапта униңға қатнашқан 205 командиниң арисида 12-орунни егилиди. 2008-жилқи Беҗин Олимпиадисида бизниң команда 29-орунда болған еди. Әгәр Оюнларниң башлинишида биз үч алтун, җәми 12-13 медаль билән дәсләпки 30 командиниң арисидин орун алимиз дегән мәҗбурийәтни алған болсақ, бу мәҗбурийитимизниң 200 пайиз орунланғанлиғини көримиз. Қисқиси, Темза дәриясиниң бойидики шәһәрдә өткән Олимпиада Қазақстан спортиниң тарихиға алаһидә сәһипә болуп йезилди. Шу нәрсә диққәткә сазавәрки, Қазақстан спортиниң хәлиқара дәриҗидики бу ғалибийити мәмликәт мустәқиллигиниң 20 жиллиғи вақтида қолға кәлтүрүлди. Бу йәрдә шундақла мәмликәттә физкультура вә спортни риваҗландурушқа дайим диққәт бөлүватқан Дөләт рәһбири Нурсултан Назарбаевниң дана сәяситиниң әң ярқин көрүнүши екәнлигиниму тилға алған орунлуқтур. Дәрһәқиқәт, бизниң барлиқ олимпиадичилиримиз өз әмгиги, тиришчанлиғи вә ғалибийәткә болған интилиши арқилиқ һәммимизни хошаллиққа бөләп, қәлб төримиздин чоңқур орун алди. Шундақ екән, бизгә хошаллиқ дәқиқиләрни һәдийә қилған пәйтләрни йәнә бир қетим әсләп өтсәк, артуқ болмиса керәк. 28-июль. Велочавандаз Александр Винокуров топлуқ мусабиқида һәммидин өтүп, мәмликитимиз ғоҗуниға дәсләпки алтун медальни салди. 29-июль. 19 яшлиқ Зульфия Чиншанло еғир атлетика бойичә 53 килограммғичә болған салмақ дәриҗисидә 226 килограммни бойсундуруп, чемпион аталди вә Олимпиада рекордини орнатти. 31-июль. Еғир атлетчи Майя Манеза 63 килограммғичә салмақ дәриҗисидә 245 килограммни көтириш арқилиқ йәнә бир Олимпиада рекордини орнатти вә алтун медальға сазавәр болди. 3-август. Светлана Подобедова 75 килограммғичә болған салмақ дәриҗисидә Олимпиада чемпиони аталди. 4-август. Илья Ильин 94 килограммғичә болған салмақ дәриҗисидә 418 килограммни бойсундуруп, дуния рекордини орнатти вә иккинчи қетим Олимпиада чемпиони атиғиға сазавәр болди. 5-август. Йеник атлетчи Ольга Рыпакова үч атлап сәкрәш бойичә алтун медаль йеңивалди. Униң нәтиҗиси — 14,98 метр. 6-август. Грек-рим күриши бойичә Даниял Гаджиев 84 килограммғичә болған салмақ дәриҗисидә мәйдисигә бронза медалини асти. 9-август. Боксчи қизимиз Марина Вольнова 75 килограммғичә болған салмақ дәриҗисидә үчинчи орунни егилиди. Гюзель Манюрова 72 килограммғичә болған салмақ дәриҗисидә аяллар арисида күрәш бойичә бронза медалиға сазавәр болди. 10-август. Боксчи Иван Дычко 91 килограммдин ошуқ салмақ дәриҗисидә мәмликитимизгә йәнә бир бронза медалини елип кәлди. 12-август. Әркин күрәш бойичә 66 килограммғичә болған салмақ дәриҗисидә Ақжүрек Танатаров бронза медалини йеңивалди. Боксчи Серик Сәпиев 69 килограммғичә болған салмақ дәриҗисидә Олимпиада чемпиони аталди. У шундақла бу қетимқи Оюнларниң әң маһир боксчиси сүпитидә Вэлл Баркер кубогиға сазавәр болди. Боксчи Әдилбек Ниязимбетов 81 килограммғичә болған салмақ дәриҗисидә иккинчи орунни егилиди. Шундақ қилип, икки һәптидин ошуқ вақит пүткүл дунияниң диққитини җәлип қилған ХХХ язлиқ Олимпиада оюнлири пәллисигә йәтти.  Әндики Оюнлар 2016-жили Бразилияниң Рио-де-Жанейро шәһиридә өткүзүлиду. Спортчилиримизниң Җәнубий Америкидики мошу мәмликәтниң спорт мәйданлиридиму жуқури маһарәт көрситип, мустәқил Қазақстан байриғини бирнәччә қетим көтиридиғанлиғиға үмүт қилимиз. 

         Шөһрәт МӘСИМОВ.