• Спорт
• 25 Сәуір, 2024

Достлуқ мусабиқиси

Йеқинда Алмута шәһиридики Туран университетиниң спорт залида «Ихсан» қаримлар топиниң уюштуруши вә Алмута вилайәтлик мәслиһәтниң депутати, «ТехноGRAND» җавапкәрлиги чәкләнгән йолдашлиғиниң баш мудири, меценат Билал Һошуровниң маддий җәһәттин қоллап-қувәтлишидә һейт мәрикисигә беғишланған волейбол мусабиқиси болуп өтти. Униңға җәми җай-җайлардин болуп, йәттә команда қатнашти. 

Мәшүр САСИҚОВ,
«Uiğur avazi»

Аһали арисида сағлам һаят тәризини тәрғип қилиш билән биллә яшларниң өзара мунасивитини мустәһкәмләш мәхситидә уюштурулған спорт мусабиқисидә Аблимит қарим Турсунов көпчиликкә мураҗиәт қилип, ушбу чарә-тәдбирниң мәхситини чүшәндүрсә, Билал Һошуров спортчиларға ақ йол тилиди. Андин һамийлар тәрипидин йейилған дәстихан әтрапида қуръан тилавәт қилинди. Расти, бу күни спортчиларму елимизниң бирқатар вилайәтлиридә йүз бериватқан тәбиий апәтләрдин хәвәрдар екәнлигини йәткүзүп, өзлириниң дуалирида улуқ Алладин шу қериндашлиримиз тартиватқан азап-оқубәтләрни йеникләштүрүшини тилиди. Шундақла һәрхил милләт вәкиллиридин тәркип тапқан команда әзалиридин сөзгә чиққучиларму болди. Улар өз сөзидә, спортчиларниң бешини қошқан мусабиқә уюштурғучи «Ихсан» топи билән һамийларға миннәтдарлиғини билдүрүп, спортниң көпчиликни дост қилидиған әң яхши қурал екәнлигини алаһидә қәйт қилди.
Та кәч киргичә давам қилған мусабиқә йәкүнидә «Ихсан» командиси ғалип чиқип, І орунни (100 миң тәңгә) йеңивалди. Әнди ІІ орунға (70 миң) Уйғур наһийәсидин кәлгән команда әзалири муйәссәр болса, ІІІ орун (50 миң) «Кәтмән» командисиниң әнчисигә тәгди. Шундақла бу күни уюштурғучиларниң қарариға бенаән, төртинчи орунға чиққан «Туран» командиси 30 миң тәңгилик мәхсус мукапатқа сазавәр болди.