- Спорт
- 01 Ақпан, 2024
Қизларму футбол ойнайду
Шәхсән өзәм Яркәнт тәвәсидә футболни пәқәт оғул балилар сөйүп ойнайду, дәп ойлап жүрәттим. Лекин наһийәдики қизларниң бу оюнға болған қизиқишини көргәндин кейин хаталашқанлиғимни билдим. Һәқиқәтәнму, футболға қизиқипла қалмай, тинмай мәшиқлиниватқан Яркәнт шәһири Җамбул намидики оттура мәктивиниң қизлар командиси йеқинда Жетысу вилайәтлик мәктәп лигисида биринчиликни йеңивалди.
Гөһәрбүви ИСМАЙИЛҖАНОВА,
«Uiğur avazi»
Бу – Җамбул мәктивиниң футболчи қизлириниң дәсләпки утуғи әмәс. Улар 2019 — 2023-жиллар арилиғида давамлиқ биринчиликни қолдин бәрмәй келиватиду. Өткән һәптидә болуп өткән Жетысу вилайәтлик чемпионаттин йәнә биринчиликни йеңивелип, җумһурийәттә өтидиған оқуғучи қизлар арисидики чемпионатқа йолланма алди.
– 5-синиптин башлап мәшиқлиниватқан қизлар командиси һәққидә сөз қилсақ, улар оюнда чәбдәс, әплик һәм тиришчан. Мәктивимиздә шундақла оғул балилар командисиму бар. Уларму дайим алдинқи орунлардин көрүнмәктә. Әнди мәзкүр қизлар оюниға тохталсақ, бу қетим улар вилайәттә 6 команда билән күч синишип, биринчи орундин көрүнди. Шундақла Диана Һәмраева – «Әң яхши һуҗумчи», Муһәббәт Мәхсүтова – «Әң яхши дәрвазичи», Элеанора Турғанова билән Рената Ғоҗәмбәрдиева – «Әң яхши қоғдиғучи», Назугум Исламова болса, «Әң яхши оюнчи» аталди, – дәйду мәзкүр мәктәпниң тәнтәрбийә пәни муәллими, мәшиқләнлүргүчиси Әзиз Сетәков.
Жетысу вилайити,
Панфилов наһийәси
68 рет
көрсетілді0
пікір