• Спорт
• 08 Ақпан, 2018

Дуния Кубоги Алмутиға кәлди

Шөһрәт МӘСИМОВ, “Уйғур авази”/ Йеқинда Алмутида шәһәрлик һакимийәт, Қазақстан Футбол федерацияси вә аммивий әхбарат васитилири вәкиллириниң қатнишиши билән ФИФА Кубогини қарши елиш мәрасими болуп өтти. Футбол бойичә дуния чемпионатиниң баш мукапити Алмутиға арида сәккиз жил өтүп “қәдәм тәшрип қиливатиду”. Уни җәнубий пайтәхтимизгә ФИФАниң рәсмий вәкиллири вә 1998-жилқи дуния чемпиони Кристиан Карамбе елип кәлди. Кубокни тәнтәнилик қарши елиш мәрасимида атақлиқ футболчи қазақстанлиқларға сәмимий қарши алғанлиғи үчүн миннәтдарлиқ билдүрүп, журналистларниң соаллириға җавап бәрди вә дуния чемпионатиниң баш мукапитиниң җумһурийитимизгә кәлгичә тоққуз мәмликәттә болғанлиғини тәкитлиди. Униң ейтишичә, Қазақстанға Кубок Пакстандин кәлди. Өз новитидә, Алмута шәһәрлик һакимийитиниң вә Қазақстан Футбол федерациясиниң вәкиллири мәмликәтниң барлиқ турғунлирини мошу чоң, әстә қаларлиқ вақиә билән тәбрикләп, Қазақстанниң Мәркизий Азиядә Дуния кубогини иккинчи қетим қобул қиливатқан бирдин-бир мәмликәт екәнлигини тәкитлиди. Мәрасимниң рәсмий қисми аяқлашқандин кейин мундиальниң баш мукапити аэропорттин “Мегацентрға” йәткүзүлди. Бу йәрдә шәһәр турғунлири уни өз көзи билән көрүш вә сүрәткә чүшүш имканийитигә егә болди. Шуни қошумчә қилимизки, Дуния кубогиниң пүткүл җаһан бойичә сәяһити өткән жили 9-сентябрьдә Москвадики “Лужники” стадионидин башланған еди. Сәяһәт дуния чемпионати һарписида аяқлишиду. Буниңғичә Кубок төрт қитъәниң 52 мәмликитини зиярәт қилиду.