• Спорт
• 19 Сәуір, 2018

Хәлиқара олимпиадида биринчи орунни алди

Мәшүр САСИҚОВ,«Уйғур авази»/ Ишиктә шәһиридики Қазақ-Түрк интернат-лицейиниң оқуғучиси Қасимҗан Асимов оқушта турақлиқ утуқларға қол йәткүзүп кәлмәктә. Мәсилән, у буниңдин бираз вақит илгири иҗтимаий гуманитарлиқ пәнләр бойичә Қостанай шәһиридә өткән оқуғучиларниң җумһурийәтлик олимпиадисиға қатнишип, қазақ тили пәнидин ІІ орунға еришкән болса, 12 — 15-апрель күнлири Хәшкиләң шәһиридики Сулейман Демирәл университетида болуп өткән «ІNFOMATRІX – 2018» хәлиқара олимпиадиға иштрак қилип, «SHORT – MOVІE» номинацияси бойичә І орунни йеңивалди. Компьютерлиқ лайиһәләр бойичә өткүзүлидиған бу мусабиқигә Қасимҗан синипдиши Данияр Мирзабаев билән һәмкарлиқта тәйярлиған «Интервью» намлиқ қисқа фильми билән қатнашқан еди. Әйнә шундақ утуқларға қол йәткүзүп келиватқан у һазир өзи билим еливатқан дәргаһниң пәхридур. 7-синиптин башлапла олимпиада-мусабиқиләргә турақлиқ қатнишип, уларда дайим мукапатлиқ орунларни егиләп келиватқан Қасимҗан Асимовқа ата-аниси билән устазлири зор үмүт артмақта. Өз новитидә Қасимҗанму уларниң еқидисини ақлашқа тиришиватиду. Бизму униң билән учрашқинимизда, дәсләп ана тилида, кейинирәк, қазақ, түрк, инглиз тиллирида билим еливатқан өсмүрниң келәчәктә техиму чоң муваппәқийәтләргә йетидиғанлиғиға көз йәткүздуқ. Өз новитидә, илим-пән йолидики дәсләпки қәдәмлиридә ғәлибә қазиниватқан Қасимҗан Асимовқа техиму егиз пәллиләрдин көрүнүшигә тиләкдашлиқ билдүримиз.