• Спорт
• 13 Қыркүйек, 2018

Уларму чоңлардин қелишмайду

Мәшүр САСИҚОВ, «Уйғур авази» Йеқинда Бесағаш вә Тәшкәнсаз йезилирида яшайдиған өсмүрләрдин тәркип тапқан «Тарим» футбол командиси тонулған спортчи Тимур Сегизбаев билән униң рәпиқиси Клара Абдулла қизиниң хатирисигә беғишланған хәлиқара турнирда ІІ орунға сазавәр болди. Қизиқарлиқ һәм кәскин күрәш шараитида өткән мусабиқә давамида команда әзалири мәшиқләндүргүчилириниң еқидисини йәрдә қоймаслиққа тиришти. Бу 2005 – 2010-жиллири туғулған өсмүрләргә устазлиқ қиливатқан Салаһидин Самахунов билән Нурамбәк Ниязовниң ейтишичә, шагиртлириниң дәсләпки ғәлибиси әмәс екән. “Көч маңғансири түзүлиду” демәкчи, командиға талланған балилар һәқиқәтәнму футболни чин дилидин сөйүп, униң үчүн «җенини» беридиғанлар охшайду. Техи кичик болушиға қаримай, һазирниң өзидә уларниң арисида кәспийләрдәк болмисиму, чоңлардин қелишмайдиғанлар йетәрлик екән. Улардин мәшиқләндүргүчиләрниң күтидиған үмүти зор. Бу қетимқи мусабиқидә тәйярлиқ яхшиму яки уларни қоллиғучилар көп болдиму, әйтәвир, «Тарим» командисиниң әзалири хошна Өзбәкстандин, Астана вә Тараз шәһәрлиридин кәлгән рәқиплирини толиму асан йеңивалди. Әлвәттә, оюнда, көп нәрсә, өзара кәйпиятқа бағлиқ. Һә, таримлиқлар болса, турнирни жуқури кәйпият билән башлап, ғәлибә билән тамамлиди. Мүмкин, уларни буниңдин кейинму үстүн пәллиләрдин көрүп қалармиз. Илаһим, шундақ болғай!