• Спорт
  • 19 Наурыз, 2019

Чемпионларға чәксиз һөрмәт көрситилди

Мәшүр САСИҚОВ, «Уйғур авази» Түнүгүн Алмута аэропортидики йолувчиларни күтүвелиш залида қолиға «Ярайсиләр, силәр бизниң пәхримиз» яки «Сухраб, Әлиҗан, Әлишер, Әлиәсқәр, Сайит чемпион!» дегән сөзләр бар плакатлар билән қучақ-қучақ гүлдәстиләрни тутқан чоң-кичикләрниң топлишип турғинини өткән-кәчкәнләр чүшәнмәй қалған болушиму мүмкин. Улар йеқинда Таиланд мәмликитиниң пайтәхти Бангкок шәһиридә өткән спорт фестивалида кикбоксинг бойичә чемпион аталған жигитләрни дағдуғилиқ күтүвелиш мәхситидә жиғилған Талғир наһийәсиниң җамаәтчилик ишлириниң активистлири, ата-анилар, дост-бурадәр вә қериндашлар еди. Талғир наһийәсидә паалийәт елип бериватқан «Нур» вә «Қизил Туғ» спорт клублирида мәшиқлиниватқан Сухраб Һашимҗанов, Әлиәсқәр Әлиәсқәров, Әлишер Султанғоҗаев, Сайит Интимақов вә Әлиҗан Абләһәтовниң бу хәлиқара мусабиқидә ғалип чиққанлиғи тоғрилиқ әхбарат иҗтимаий торларда бир-икки күн илгири тарап, уларниң йеқинлирини хошаллиққа бөлигән. Әнди бүгүн улар үзму-үз дидарлашти. Бу йәрдә шу көрүшүш тоғрилиқ «тәпсилий» тохтилишқа тоғра келиду. Шундақ қилип, әшу жирақ җайдин утуқ билән қайтқан чемпионларни күтүвелиш шу қәдәр махташқа әрзигидәк өттики, униң ахири тойға улашти десәк, мубалиғә әмәс. Дәсләп аэропорт бенасида қизғин тәбрикләшләр билән гүлдәстиләр тутуш «рәсмийити» түгигәндин кейин, җумһурийәтлик Уйғур этномәдәнийәт мәркизи йенидики Спорт комитетиниң рәиси Әкрәм Нурдунов, ҖУЭМниң Талғир наһийәлик этномәдәнийәт мәркизи шөбисиниң рәиси Иминҗан Тохтахунов, униң орунбасари Шерипҗан Илияров, шөбә йенидики жигитбашлири кеңишиниң рәиси Октябрь Қурбанниязов, наһийәлик Ханим-қизлар кеңишиниң рәиси Каминур Сопиева, Туздыбастав йезисиниң баш жигитбеши Турғанҗан Вахъяров вә башқилар ғалипларни утуғи билән тәбрикләп, дайим мошундақ елимизниң көк байриғини техиму егиз көтиришигә тиләкдашлиқ билдүрди. Улар өз сөзидә, чемпионларниң бу ғәлибиси Дөләт рәһбири Нурсултан Назарбаев елан қилған Яшлар жилиға қошқан төһписи екәнлигини алаһидә тәкитлиди. Һәқиқәтәнму сағлам һаят тәризини дост тутуп, тәҗрибилик мәшиқләндүргүчиләрдин тәлим еливатқан бу яшлиримизниң утуғи һәммимиздә қандақту-бир ишәнчә үмүтлирини пәйда қилди. Уларниң арисида қабилийәтлик, тиришчан шараит яр бәрсила, башқилардин һеч пәриқләнмәйдиған қаракөзлиримиз йетәрлик. Биз пәқәт алға интилғанларға анда-санда көз қиримизни ташлап, жириғини йеқин, йәтмигинини толуқтуруп қойсақла купайә. Бу җәһәттин биз сөз қиливатқан чемпионлар сәпәргә атлиниш алдида мәбләғкә муһтаҗ болғанлиғи раст. Наһийәниң жут-җамаәтчилиги «тама-тама көл болур» демәкчи, қол-қолчә көпчилик болуп, биркишилик ярдимини қилди. Андин спорт десә, ичиватқан ешини ташлайдиған оғланлиримизниң бири – Зәйнидин Ғоҗәхмәтовниң күч чиқириши түпәйли лазим болған пул толуғи билән жиғилип, чемпионлар ишәшлик сәпәргә атланди. Әлвәттә, пәрзәнтлирини һәртәрәплимә қоллап-қувәтлигән инсанларға ата-ана, қериндашларниң ейтар миннәтдарлиғи чәксиз. Әнди спортчиларни мусабиқигә тәйярлаш вәзиписини өз зиммисигә жүклигән мәшиқләндүргүчиләр тоғрилиқ икки еғиз сөз. Мәсилән, өсмүрләрниң яман илләтләрдин жирақ болушини истәп, өз өйидә «Қизил Туғ» спорт клубини ачқан Әркин Шаев спорт үчүн «җенини беридиған» жигитләрниң биридур. Йешиниң кичиклигигә қаримай, бүгүнгә қәдәр талай чоң-кичик мусабиқиләрдә дайим алдинқи орунларни қолдин бәрмәй келиватқан Әлишер Султанғоҗаев билән Сайит Интимақовниң мәшиқләндүргүчиси Ринат Авакриевму көплигән жиллар давамида нурғун чемпионларни тәйярлап чиқти. Мана мошундақ кәспигә садиқ мутәхәссисләрдә мәшиқләнгән чемпионларға һөрмәт көрситиш шу күни Бесағаш йезисидики «Нур» кафесиниң алдида давамлашти. У йәрдә уларни миллий йосунда нағра-сүнәйләр садаси астида күтүвалған көпчилик дәрһал өзлириниң «кумирлири» билән рәсимгә чүшүшкә башлиди. Чемпионларниң рәсимлири селинған мәхсус баннер алдида «селфилар» хелила узаққа созулди. Бу һәркимгә хуш кәйпият беғишлайдиған қалаймиқанчилар селиккәндин кейин йәнә жут атилири бүгүнки мәрасимниң «қәһриманлириға» иллиқ тиләкләр ейтип, келәчәктә уларға мустәһкәм саламәтлик тилиди. Шундақла бир топ жут активистлири ахирқи вақитларда саламәтлигигә бола, җәмийәтлик ишлардин қол үзүп қалған миллий мәдәнийитимизниң җанкөйәри Арзигүл һаҗим Һошурованиң өйигә қәдәм тәшрип қилип, нәвриси Әлишерниң утуғи билән тәбриклиди.

73 рет

көрсетілді

0

пікір
Алдыңғы мақала Устаз роһини хуш қилди
Келесі мақала Токиодин хуш хәвәр кәлди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

28 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы