• Спорт
• 13 Қараша, 2019

Әндики мәхсәт — Олимпиада

Йеқинда ХХҖниң Ухан шәһиридә һәрбийләр арисида хәлиқара спорт мусабиқилири өтти. Униңға дунияниң 109 дөлитидин 9 миңдин ошуқ спортчи қатнашти. Мәзкүр мусабиқидә Қазақстанниң бокс бойичә талланма командиси яхши нәтиҗиләргә еришти. Команда 7 медаль, шуниң ичидә 2 алтун, 2 күмүч вә 3 бронза медаль йеңивалди. Бу йәрдә Қазақстан талланма командиси тәркивидә болған Дилмурат Меҗитов өз салмақ дәриҗисидә иккинчи орунни егилиди. Шу мунасивәт билән биз Дилмурат Миҗитовниң шәхсий мәшиқләндүргүчиси Долқун Камековни сөһбәткә җәлип қилдуқ. Йолдаш МОЛОТОВ, «Уйғур авази» — Долқун ака, Дилмуратниң новәттики утуғиға қандақ баһа бәргән болар едиң? —Хитайда өткән мусабиқә чоң турнир болуп һесаплиниду. Дилмуратниң мошу мусабиқигә қатнишишиниң өзи униң дәриҗисини көрсәтсә керәк. Көргән болсаңлар, чарәкфиналлиқ җәңдә рингтики судья Әзәрбәйҗан боксчисиниң қолини көтәргән еди. Бизниң команда вәкиллири дәрһал қарши чиқип, судьяларниң җәңни қайтидин видеода көрүшини тәләп қилди. Судьялар җәңни көрүп, һәқиқәтәнму Дилмуратниң йәңгәнлигини етирап қилишти. Финалда Дилмурат белоруссиялик Дмитрий Асанов билән күч синашти. Бизниң боксчи рәқивидин бир қәдәр жуқури һүнәр көрсәткән болсиму, әпсус, судьялар башқичә пикирдә болди. Шәхсән өзәмниң пикри, Дилмурат мәзкүр мусабиқидә мунасип һүнәр көрсәтти. Иккинчи орунму мана мошундақ мусабиқиләрдә чоң утуқ болуп һесаплиниду. — Дилмурат билән қачандин бери ишләватисән? — Мән илгири кикбоксинг билән шуғулландим вә яшларни шу спорт түри билән мәшиқләндүрдүм. Шагиртлирим арисидин бирнәччә дуния чемпионлири чиқти. Кейин бирәтола боксқа өттүм. Чүнки бокс Олимпиада оюнлириға кириду. Арминим — Олимпиада чемпионини тәрбийиләш. Дилмурат билән 2008-жилдин бери ишләп келиватимән. Дәсләп оттуз бала кәлгән. Шуларниң арисидин бирла Дилмурат таллинип чиқти. Униңда сунмас ирадә, қайтмас роһ бар. Әң муһими, тәбиий талант, наһайити әмгәкчан, җисманий күчлүк, техникиси яхши, ғалибийәткә дегән интилиши зор. Шуңлашқа утуққа йетиватиду. — Утуқ демәкчи, Дилмуратниң утуқлири һәққидә ейтип өтсәң? — Дилмурат 2009 — 2015-жиллар арилиғида Алмута шәһириниң бирнәччә қетим чемпиони. 2015-жили болса, Қазақстан чемпиони аталди. Униңдин ташқири 2013-жили Украининиң Одесса шәһиридә, 2014-жили Хитайда, шу жили Москвада өткән әнъәнивий турнирларниң ғалиби. Шундақла «Астана Арланс» командиси тәркивидә, чемпион аталди. Бийил елимиз Спартакиадисида ғалип чиқти. Мәзкүр турнир дәриҗиси бойичә Қазақстан чемпионати билән тәң. Бу турнир ғалиплири елимизниң талланма командиси тәркивигә кириду. Қаидә бойичә, боксчилар он салмақ дәриҗисидә һүнәр көрситиду. Әлвәттә, Спартакиадиға қатнишиш алдида һәрбир регион спортчилири арисида таллаш мусабиқилири өтиду. Шу мусабиқиләрдә ғалип чиққанларла Спартакиадиға қатнишиш йолланмисини алиду. Демәк, күчлүк боксчиларла рингқа чиқиду. Дилмурат өз салмақ дәриҗисидә (64 кг.) Алмутида биринчи орунни егилигән. Хошал қилғини, шагиртим мошу турнирда елимиз бойичә 64 килограмм салмақ дәриҗисидә әң күчлүк боксчи екәнлигини йәнә бир қетим дәлиллиди. Алмута командиси тәркивидә пәқәт Дилмуратла утуққа йәтти. У шуниңдин кейин Қазақстан Җумһурийитиниң миллий талланма командиси тәркивигә кирди. Әнди Дилмурат миллий талланма команда тәркивидә чоң хәлиқара мусабиқиләргә қатнишиватиду. Хитайдики мусабиқә шуниңға мисал. — Келәчәктә қандақ планлириңлар бар? — Елимиздә бокста риқабәт күчлүк. Қазақстанда 64 салмақ дәриҗисидә үч күчлүк боксчи бар — Дилмурат Миҗитов, Закир Сафиуллин, Саматали Төлтаев. Һәммимизгә мәлумки, һазир Олимпиадиға таллаш башланди. Олимпиадиға йолланма елиш турнирлириға қатнишиш үчүн яхши нәтиҗиләрни көрситиш керәк. Кейинки һәптидә биз Ақтавға атлинимиз. Декабрьда Қарағандида Жарылғапов хатирисигә беғишланған хәлиқара әнъәнивий турнирға қатнишимиз. Мошу турнирларда яхши һүнәр көрсәтсә 2020-жили Хитайда февраль ейида вә әтиязда Европида өтидиған Олимпиада лицензияси үчүн мусабиқиләргә қатнишимиз дегән планимиз бар. Мошу турнирларда мукапатлиқ орунни егилисә, Олимпиадиға қатнишиш мүмкинчилиги пәйда болиду. Дилмурат үчүн бу яхши пурсәт. Бу пурсәтни қолдин бәрмәслигимиз керәк. Униң үчүн нурғун тәр төкүш тәләп қилиниду. Мениң мәхситим вә арминим — Олимпиада чемпионини тәрбийиләш. Мошу арминимға йетидиғинимға үмүтүм бар. — Һазир кәспий бокста қазақстанлиқ боксчиларниң исми яхши тонуш. Дилмуратниң кәспий боксқа кетиш ойи барму? — Дилмурат һазир яш. Чоң мусабиқиләрдә тәҗрибә топлаватиду, истиқбали яхши. Униң мәхсити ишқиваз бокста мүмкинқәдәр утуққа йетиш, өзини тонутуш. Әлвәттә, Дилмуратниң һүнирини көрүватқанлар, диққәт нәзәридә тутуватқанлар, униң иқтидарини билиду. Бизгә Америкидики кәспий бокс клублиридин бирнәччә тәклипләр болди. Амма униңға алдираш йоқ. Асасий мәхситимиз — Олимпиада. Шуниңдин кейин йәнә ойлинип көрәрмиз. — Сөһбитиңгә рәхмәт.