• 1-март – Миннәтдарлиқ күни
• 27 Ақпан, 2020

Тәшәккүр ейтқум келиду

Чоң Ачиноқа тәвәдики қедимий уйғур жутлириниң бири. Мана мошу жуттин хәлқи үчүн, ели үчүн хизмәт қилған батурларниң, шаир-язғучилар билән алимларниң көпләп йетилип чиққанлиғи һәммигә мәлум. Улар билән биз, жутдашларла, әмәс, шундақла пүткүл хәлқимиз пәхирлиниду десәм, мубалиғә болмас. Кейинки жилларда йүз бәргән қийинчилиқларға қаримай, йезимиз аһалиси өз тирикчилигини йолға қоюп, заманға лайиқ иш тутуватиду. Бүгүнки күндә йезимизда 70 уйғур аилиси истиқамәт қилиду. Жутумиз өм, хәлқимизгә аит һәрқандақ ишларни дайим йәкдиллиқ билән қоллап-қувәтләшкә тәйяр. Болупму яшлар паалийәтчанлиғи, тәшәббускарлиғи билән биз, жут чоңлирини, қайил қилмақта. Мана, өткән жили һазир Алмутида истиқамәт қиливатқан жут яшлириниң тәшәббуси билән волейболдин турнир өтти. Әйнә шу турнирға тәйярлиқ көрүш мәхситидә аһалиниң қоллап-қувәтлиши вә маддий ярдими түпәйли волейбол мәйданчисиму бәрпа қилинди. 2020-жилға “Уйғур авази” гезитиға муштири топлаш мәвсүмидиму чоңачиноқилиқлар өмлүгини йәнә бир қетим намайиш қилди. Жутниң жигитбеши Нурлан Мәхпиров, жут активистлири Задалин Сәһәтов, Илья Қиясов вә башқиларниң көп күч чиқириши түпәйли йезидики 70 аилиниң һәммиси бир кишидәк «Уйғур авази» гезитиға муштири болди. Ениғирақ ейтсам, 70 аилә 70 данә “Уйғур авазиға” йезилди. Жутниң өмлүги демәкчи, йеқинда һазир Чонҗа йезисида яшаватқан жутдишимиз Әхмәт Хетиповниң өйигә от кетип зәрдап чәккүчиләр, қийин әһвалда қалди. Бу хәвәрдин учур тапқан жутдашлар дәрһал ярдәм қолини сунушқа алдириди. Алмутида яшаватқан Нәрмидин Пәхирдинов, Әршидин Әмәров, Муфтуллам Мурадилов, Тохтахун Әхмәтов, Дилияр Талипов, Муһидин Имашев, Турғунҗан Бабахунов вә башқиму яшлиримиз жутдашларни уюштуруп, ярдәм қилишқа киришти. Шундақла жутумиз турғунлириниң һәммиси дегидәк имканийитиниң баричә ярдәм қолини сунди. Нәтиҗидә 300 миң тәңгә әтрапида мәбләғ топланди. Уни өткән дүшәнбә күни жутумизниң жигитбеши Нурлан Мәхпиров бир топ вәкилләр билән мәхсус Чонҗа йезисиға берип, Әхмәт Хетиповқа тапшурди. У жутдашлириға чәксиз миннәтдарлиғини изһар қилди. Мәнму, пурсәттин пайдилинип, Миннәтдарлиқ күни мунасивити билән жутдашлиримға рәхмитимни изһар қилмақчимән. Биз һәқиқәтәнму жутумизниң өмлүги билән пәхирлинимиз. Ерлан ИЛИЯСОВ. Уйғур наһийәси.