• 1-март – Миннәтдарлиқ күни
• 29 Ақпан, 2024

Ана рази — әл рази

Елимиздә 1-норуз — Миннәтдарлиқ күни дәп елан қилинғандин бу ян бу күн чоң мәйрәмгә айланди. Биз, Чоң Чиған йеза округи жут-җамаәтчилиги округтики мәктәпләрдә, иш вә оқуш орунлирида, аилимиздә бу күнни дағдуғилиқ атап өтүмиз. Чүнки бу күни биз бир-биримизгә, елимизгә, устазлиримизға, чоң әвлатқа, бизгә һаят бәргән ата-анимизға, кәйнимиздин изимизни бесип келиватқан қаракөзлиримизгә миннәтдарлиғимизни ейтишқа алдираймиз. Мән, мошу пурсәттин пайдилинип, 1-норуз — Миннәтдарлиқ күнидә анилиримға пәрзәнтлик миннәтдарлиғимни изһар қилғум кәлди. Чүнки мени йоруқ дунияға елип келип тәрбийиләп, оқутуп, қатарға қошқан анам Разийәм Даурова һаяттин өткән болсиму, һаятта өз анамдәк болуп, билмигәнни билдүрүп, һаят атлиқ даванлардики синақлардин сүрүнмәй өтүшкә үгитиватқан есил анам-қейинанам Мейманқиз Әхмәтова йенимда. Мән 23 йешимда Чоң Чиған йезисидики Мәһәмәт вә Мейманқиз Садировлар аилисигә келин болуп чүштүм. Мейманқиз анам мени өзлириниң алтә пәрзәндиниң қатарида дәсләпки күнила өз қизидәк қобул қилди. Чүнки анам наһийәдики тонулған устазларниң бири болғачқа, мени келин сүпитидә әмәс, бәлки өз балилириниң қатарида көрди. Өзәм Чоң Чиған йеза округи һакимийитидә баш мутәхәссис-юрист болуп ишлигәчкә, сәһәр кетип, кәч келип, дөләт хизмитидә болуватқинимғиму талай жиллар болупту. Шуңа мениң мошу йеза һакимийитидики тинимсиз, түгимәйдиған иш-паалийитимни елип беришимға бирдин-бир зәмин яратқан анам Мейманқиз дәп һәқлиқ түрдә пәхирлинимән. 
Мән анамдин немини үгәндим дегән соалға бәзидә җавап издәймән. У «сәккиз қирлиқ, бир сирлиқ» аял болғачқа, һәммини үгәндим дәп ейтишқа һәқлиқмән. Анам мәктәптин келип, өлчүк йәргә көктат терип, бағда мевиләргиму қарайдиған, у тикинчилик һәм тоқумичилиқ қилатти. Мәйрәмләрдә бала-чақисиға кийим тикиш униң әмиги еди. Шуңа мәктәптин келип тикиш машинкисида та йерим кечигичә тикинчилик қилатти. Көрпә қураш, тоқумичилиқ қилишқиму маһир. Һазир биз тирикчилик ғемидә жүрүп, бүгүнки яшларға немә үгитиватимиз дәпму ойлаймән бәзидә. Әң муһими, мениң анам наһайити сәвир-тақәтлик. 
Анамниң алтә пәрзәндиниң нәврилири, билим вә тәрбийә бәргән шагиртлири арисидин изини бесип муәллимләр йетилип чиқти. Чоң қизи Гүлшат, Панфилов наһийәсиниң Пәхрий граждини, барлиқ аңлиқ һаятини педагогика колледжида хореограф болуп, келәчәк муәллимләргә тәлим- тәрбийә бәрди. Бизниң пәрзәнтлиримиздинму момисиниң изи билән меңип, әвлат тәрбийиләватқанлиғи анамниң шатлиғи. Һәмраҗан иккимиздин көргән нәврилиринила мисалға алай, чоң оғлумиз Рәшит педагог-психолог кәспини егилиди. Келинлиримиз Дилинур билән Шахниза математика вә биология пәнлиридин дәрис бериду.
 
Гүлнар СУЛАЙМАНОВА,
Чоң Чиған йезилиқ округиниң 
баш мутәхәссис-юристи 
Жетису вилайити