• 1-март – Миннәтдарлиқ күни
• 29 Ақпан, 2024

Достлуқ һәммидин әла

Қазақстан хәлқи Ассамблеяси җумһурийитимиздики милләтләрара мунасивәтләрни мустәһкәмләштә наһайити чоң әһмийәткә егә надир институт. У йүздин ошуқ милләт вәкиллиридин тәркип тапқан елимиздә хәлиқләр достлуғини техиму мустәһкәмләшкә өзиниң зор үлүшини қошмақта. 

Гөһәрбүви ИСМАЙИЛҖАНОВА,
«Uiğur avazi»

Йеқинда Панфилов наһийәсигә елимиз пайтәхти — Астанадин, йәни Қазақстан Җумһурийити Президенти мәмурийити Қазақстан хәлқи Ассамблеяси кативатиниң сектор йетәкчиси Қайрат Баймулдинов, ҚХА медиаторлар кеңиши рәиси Шерзат Пулатов, ҚҖ Мәдәнийәт, әхбарат министрлигиниң этносларара мунасивәтни тәрәққий әткүзүш комитетиниң экспертлири қәдәм тәшрип қилип, бир һәптә мабайнида тәвәдә болуп, аһали билән учришишларни өткүзди.
ҚХА вәкиллири билән дәсләпки учришиш Панфилов наһийәлик һакимийәтниң мәҗлисләр залида өтүп, униңға һоқуқ қоғдаш органлириниң рәһбәрлири, этномәдәнийәт мәркәзлириниң рәислири қатнашти. Чүштин кейин болса, Яркәнт шәһиридики наһийәлик Мәдәнийәт өйидә иш вә оқуш орунлири рәһбәрлири, наһийәдики мәктәп муәллимлири, мечит имамлири, яшлар вә җамаәтчилик вәкиллири билән баш қошти. Дәсләп Панфилов наһийәсиниң һакими Марат Сағымбек Астанадин кәлгән меһманларға көпмилләтлик тәвә турғунлириниң турмуш-тирикчилигидин қисқичә мәлумат бәрди.
Шуниңдин кейин сөз алған ҚХА йенидики илмий эксперт кеңиши рәиси Айгүл Садвақасова, Қайрат Баймулдинов, Шерзод Пулатов вә башқилар сөз елип, бу қетимқи сәпиридә наһийә аһалиси билән йеқиндин тонушуш мәхситидә кәлгәнлигидин ейтти. 
— Шәхсән өзәм ҚХА тәшкил қилинған дәсләпки күндин униң әзаси сүпитидә он сәккиз сессиясигә қатнаштим, — деди новәттики натиқ Қазақстан маарип әлачиси, Панфилов наһийәсиниң Пәхрий граждини Реһимҗан Тохтахунов. — ҚХА бу Қазақстандики һәрхил милләтләрниң бешини қошуватқан тәңдиши йоқ җәмийәтлик тәшкилат. Биз һәрбир сессиядә тили башқа амма дили, мәхсити течлиқпәрвәр, вәтәнпәрвәр инсанлар билән учришип, илһамландуқ. Бүгүнки таңда Ассамблея әзалириниң қатари әң илғар пикирлик, билимлик, инавәтлик мутәхәссисләр билән толуқтурулуватқанлиғи мени хошал қилиду. Әнди Панфилов наһийәсигә кәлсәк, тәвәдә үч этномәдәнийәт мәркизи паалийәт елип бериватиду. Мән Панфилов наһийәлик Уйғур этномәдәнийәт мәркизигә 20 жилдин ошуқ вақит рәһбәрлик қилдим. Тәвәниң асасий турғунлири уйғурлар билән қазақлар. Бир-биримизни тәрҗимансиз чүшинимиз. Қиз берип, оғул өйләп, бир кочида хошна болуп яшап, худди қериндашдәк болуп кәттуқ. Биримизниң бешиға еғир күн чүшсә йәнә биримиз һечқачан қарап турмаймиз. Биз һәммимиз бала болдуққу. Бир-биримиз билән сөз талаштуқ, вақираштуқ. Мундақ пәйтләрдә униң миллитини сорап, әһвални техиму җиддийлаштурушниң һаҗити йоқ, дәп ойлаймән. Шуңлашқа мән балиларни аилидә, бағчида, мәктәптә милләткә бөлүнмәй, достлуққа, бирликкә дәвәт қилидиған тәрбийәвий әһмийити чоң чариләрни уюштурушқа көңүл бөлүшкә чақирған болар едим. Чүнки достлуқ һәммидин әла. 
Новәттики натиқлар Көктал йеза округидики Ақсақаллар кеңишиниң рәиси Сайлау Солтанқулов, славян этномәдәнийәт мәркизи әзаси Алена Коробова, әмгәк ветеранлири Тохтарбай Кәрибаев, Қурмаш Нүсипов, Әғзәм Мәрүпов, Турғанҗан Шәмахунов вә башқилар яркәнтликләрниң әзәлдин қелиплашқан достлуғини тәкитләп, өсүп келиватқан әвлатни достлуққа, бирликкә тәрбийиләштики пикир-тәклиплири билән ортақлашти. 

Жетису вилайити,
Панфилов наһийәси