• 1-март – Миннәтдарлиқ күни
• 29 Ақпан, 2024

Билал ҺОШУРОВ: “Миннәтдарлиқ – у яхшилиқни унтумаслиқ»

Миннәтдарлиқ күни – қазақстанлиқ вәтәнпәрвәрликниң, бирлик билән достлуқниң мәйрими. Қазақстанлиқлар бу мәйрәмни дәсләпки қетим 2016-жили 1-норузда нишанлап өтти. Бу күни Қазақстан хәлқи Ассамблеясиниң қурулған күни. Мәхсәт – көпмилләтлик Қазақстанда этносларара разимәнлик билән милләтләрара мунасивәтни мустәһкәмләштин ибарәт. Мәзкүр мәйрәм һарписида биз, Алмута вилайәтлик мәслиһәтниң депутати, көрнәклик меценат Билал Һошуровни қисқа сөһбәткә җәлип қилған едуқ. 

Бәхтишат СОПИЕВ,
«Uiğur avazi»

 – Билал Талғатоғли, сиз миннәтдарлиқ дегәнни қандақ чүшинисиз?
– Миннәтдарлиқ – мениңчә, бир адәмниң қилған яхшилиғини унтумаслиқ. 
– У күни сиз алди билән кимгә миннәтдарлиқ билдүргән болар едиңиз?
— Алди билән Яратқан егәм Алла таалаға. Андин ата-анамға миннәтдарлиғим чәксиз. Мән әсли тәбиитимдин бириниң маңа қилған яхшилиғини һечқачан унтумайдиған адәм. Мәсилән, бүгүнки күндә мошундақ утуқларни қолға кәлтүрүшүмдә кимләр маңа йеқиндин яр-йөләк болди? Уларни унтуш әсла мүмкин әмәс. Көпчилик аңлиған болсиму, уларниң исимлирини аташтин зерикмәймән. Тиҗарәтниң қир-сирини үгәткән туздыбаставлиқ Рәхмәтҗан һаҗим чоң дадамни вә униң пәрзәнтлиридин үгәнгинимни қандақ унтимән? Кона “Жигулисини” «мингүзүп» қойған дадамниң қияпити мошу кәмдә көз алдимда туриду. «Тирикчилик қилғин» дәп пенсия пулини тутқузуп қойған момамчу? Мана мошуларниң арқисида мән «Билал Һошуров» болуп шәкилләндим. 
–    Әнди сизгә миннәтдарлиқ билдүрүватқан адәмләр көпму?
– Наһайити көп десәм, махтанғандәк болуп қалимән. Әмәлдарлардин башлап, аддий адәмләргичә телефон қилип, хәлиқ үчүн қиливатқан азду-тола хәйрихаһлиқ ишлиримға өзлириниң миннәтдарлиғини изһар қилип туриду. Телефонимни билмигәнләр «салам» йоллайду. Мону бир миннәтдарлиқ һечқачан ядимдин чиқмайду. Бир киши пул сорап кәпту. Ейтишичә, биригә қәриз болуп қелип, уни тазиму қиставатқан көрүниду. Сориған пулиниң йеримини берип турдум. Униң кимгә қәриз екәнлигини тепип, пулни қайтуруш муддитини узартип бәрдим. Вақит өтүп, мениңдин пул елип турған адәм әвуниңму, мениңму қәризимдин қутулди. Һәтта өзи путиға турувелип, ихчам навайхана ечивапту. Маңа миннәтдарлиқ сүпитидә он данә тонур ненини көтирип кәпту. Униң бу һәрикити мениң жүригимдә мәңгүгә қалди. 
– Билал Талғатоғли, қандақ ойлайсиз, «миннәтдарлиқ мәйриминиң» һаҗити барму?
— Әлвәттә, бар. Буни әһмийити наһайити чоң сәясий мәйрәм десәм, хаталашмаймиз. Қазақстан хәлқи Ассамблеяси сессиялириниң биридә сөзгә чиққучиларниң бири: «Қазақстан хәлқи Ассамблеяси қурулған күн, 1-мартни һәр жили барлиқ этносниң бир-биригә, йәни худди өзиниң даласидәк кәң қәлби билән башқа милләтләрни қарши алған қазақларға миннәтдарлиқ ретидә атап өтсәк, тоғра болатти. Бу меһриванлиқниң, пүткүл қазақстанлиқларниң бир-биригә болған достлуғи билән муһәббитиниң ярқин мәйрими болар еди» дәп сөзлиди. Шуңлашқа бу мәйрәмниң қазақстанлиқлар үчүн мәзмун-маһийити наһайити жуқури, дәп ойлаймән.