• Шеирлар
• 06 Мамыр, 2021

Ғалибийәт

Бу күн һәммә бәхит сүргәнди, 
Қайғу-һәсрәт, әләм жүткәнди.
Хуш тәбәссүм әйләп йүзләрдә,
Бовақларму қенип күлгәнди. 

Шу күн уруш оти өчкәнди, 
Течлиқ һаят һөкүм сүргәнди.
Ғалип чиқип Кеңәшләр ели,
Фашист-явуз гөргә киргәнди.

Таңму мәғрур хушвақ атқанди, 
Йеңиш-бәхит күлүп баққанди. 
Ғалибийәт хуш хәвиридин
Течлиқ-кәптәр қанат қаққанди. 

Мудһиш һаят камал тапқанди,
Самадин от-чәшмә яққанди. 
Аман қалған җәңчи атилар
Йеңиш билән жутқа қайтқанди.

Нә бир қисмәт баштин өткәнди, 
Матәмгә әл-жутум чөккәнди.
Үч бүҗгәклик «қара хәт» елип, 
Җудалиқниң йешин төккәнди. 

Бар иш арқа сәптә қалғанди, 
Гөдәк қолға кәтмән алғанди.
Күт патқичә ишләп етизда, 
Йегәнлири көмәч, талқанди.

Макан-җайи дала, хаманди, 
Җоза – қуруқ, көрпә – саманди. 
Бәйпил заман, течлиқ һөкүмран, 
Бүгүнки күн арзу-арманди. 

Ярамлиқлар җәңгә кәткәнди, 
Берлинғичә меңип йәткәнди. 
Вәтән үчүн кечип җенидин, 
Қоқас отни, қанни кәчкәнди.

Талай шәһәр, йеза өртәнди, 
Гүллүк дала күлгә айланди. 
Оққа учуп қиран жигитләр,
Йәр қойниға бевақ бөләнди. 

Даван-чөлни бесип өткәнди,
Сиз, биз үчүн қенин төккәнди. 
Шейит болған исми намәлум, 
Хәт-хәвәрсиз йоқап кәткәнди. 

Дүшмән ғалҗир болуп кәткәнди, 
Әркин әлни мәзлум әткәнди.
Тиз пүктүрүп ахир бизниң әл, 
Рейхстагқа туғин тиккәнди. 

Яв урушни бирлик йәңгәнди, 
Аңа талай өмрин бәргәнди. 
Бәдилигә өмлүк-достлуқниң
Ғалибийәт қолға кәлгәнди! 
 
Абдуманап АБЛИЗОВ.

Уйғур наһийәси.