• Шеирлар
• 16 Наурыз, 2024

Сеғиндимғу җеним...

Рошәнгүл Қәйсәрқизи Асимова 1969-жили Яркәнт тәвәсидә туғулған. Уйғур мәктивидә билим алған. Кичигидинла шеирийәтни өзигә пир тутуп өскән яш шаирә. Өсәкниң ғәзәлхан шаири Хелил Һәмраниң отлуқ шеирлиридин қанатлинип, кейинирәк өзиму сөз марҗанлирини қәғәз бетигә тизишқа башлиған. Кишини хошал қилидиған йери шуки, талантлиқ қәләм саһибиниң (шундақ дәп ейтишқа толуқ үмүт-ишәнчә бар), «Ашиғимән иҗатниң» намлиқ тунҗа топлими көпчиликниң иллиқ, иҗабий инкасиға еришти. Төвәндә диққитиңларға яш шаирәниң техи һеч йәрдә елан қилинмиған бир түркүм шеирлирини һавалә қилиш билән бирқатарда кәлгүси иҗадиға ақ йол тиләймиз. Илаһим, булиғиңиз соғулмисун, Рошәнгүл! 

Сеғинимән
Сеғинимән җеним сизни секундара,
Жирақларда таңлар атқан күнләрара.
Сеғинимән сөзләшсәкму минутара,
Сизни ойлап уйқа кәлмәс түнләрара...

Ямғурлардин сорап сизни сеғинимән,
Тамчә-тамчә йешим сүртүп сеғинимән.
Сеғиндимғу җеним... дегән сөзүңизни,
Қайта-қайта оқуп мәнму сеғинимән...

Икки яқта чимирлиған юлтузларға,
Тоймай қарап айдин сорап сеғинимән.
Сиз қариған аппақ қардәк булутларға,
Мәнму қарап салам йоллап сеғинимән.

Аччиқлинип қизғансиңиз сеғинимән,
Мәнму сизни сөйүп туруп қизғинимән...
Пәқәт сизни кинәп турған бу жүрәкни,
Сизгә сақлап қулуп селип сеғинимән...

Татлиқ сезим чирмап дилни сеғинимән,
Иллиқ баққан шу көзләрни сеғинимән.
Телефонға қарап-қарап сеғинимән,
Күни, түни муңдашсақму сизни йәнә сеғинимән...

Тәшвишсиз таң атиду йәнә
Бәк еғир күнләр чүшүп бу башқа,
Тиничлиғиң һәм кәткәндә тенәп.
Қәлбиңни чилап қанлиқ көз яшқа,
Кетәр үз өрүп сөйгәнләр һәтта.

Ишәнчә артқан күнләр бәк жирақ,
Ишәш йоқ екән һечкимгә пәқәт.
Пилдирлап янған дилдики чирақ,
Көйүп күл болар наһәқтин-наһәқ...

Еғир күнләрму кетәр унтулуп,
Күләрсән сәнму башқидин йәнә.
Достлар шу чағда бақар зоқлинип,
Тәшвишсиз таңму атиду йәнә...

Билсәң
Жиллар жилларни өтәр қоғлишип,
Суларму ақар суға улишип.
Йоллар йәткүзүп мәнзилгә бизни,
Яхшилар яшар меһир йоллишип.

Беһөддә өтмәс бу өмүр билсәң,
Бебаһа һәр күн қәдрини билсәң.
Қайғурма һәргиз синақлар үчүн,
Яхшилиқ бәк көп һаятта билсәң.

Жүрәккә жүрәк керәктур билсәң,
Көңүл шатлиғи меһирдур билсәң.
Шуңа рәнҗитмә назук көңүлни,
Бу һаят гөзәл сөйүшни билсәң...

Рошәнгүл АСИМОВА.