• Һасан-һүсән
• 11 Қаңтар, 2024

Шаир-сөз зәргари

Әсли, инсанға һаятта су, һава, нан қандақ һаҗәт болса, поэзияму шундақ һаҗәт дәп ойлаймән. Чүнки йерим әсирлик һаятини шеирийәткә беғишлиған, әдәбиятни сөйүп, шу әдәбият қайниминиң ичидә болуп, тинимсиз әмгәк, һармай­-талмай үгиниш-­издиниш йолида қәләм тәврәткән қанчиму шаирлиримиз бар. Абдулһәй Рози, Долқун Ясенов, Мөмүнҗан Һәмраев, Һезим Искәндәров, Өмәр Муһәммәдий, Илия Бәхтия, Лутпулла Мутәллип, Патигүл Мәхсәтова әйнә шулар җүмлисидиндур. 
 Һезим Искәндәров намидики оттура мәктәптә шаирларниң һөрмитигә беғишланған 5 — 10-синиплар арисида «Шаир — сөз зәргари» намлиқ әдәбий кәч болуп өтти. Уни мәктәп мудири Ришат Розахунов ечип бәрди. 
 Шаирларниң шеирлири һаятимизниң роһи билән суғирилған. Уларниң шеирлири һәрқачан заман билән һәмнәпәс болуп, һаятниң муһим мәсилилирини әкис әттүрәлигән. 
Кәч давамида бүгүнки күндә көпчилик китапханлар тәрипидин етиварға елинған, һәқиқий илһам билән йезилған шеирларни оқуғучилар ипадилик оқуп, тамашибинларниң алқишиға сазавәр болди.
 Шаирлиримизниң жүрәктин чиққан әң есил туйғулири, қәлбий кәчүрмилири вә һаятқа болған мунасивәтлирини өз иҗадийитидә әкис әттүридиған шеирлири мәңгү ядимизда сақланғуси. 
 Малика АХТАНОВА, 
Һ.Искәндәров намидики Ават оттура 
мәктивиниң 8-«Б» синип оқуғучиси
Уйғур наһийәси