• Һасан-һүсән
• 11 Қаңтар, 2024

«Тәуелсіздік дарыны» аталди

Рашидәм РӘҺМАНОВА,
«Uiğur avazi»

Наиль Талғатов – Исмайил Тайиров намидики оттура мәктәпниң 6-синипида билим алиду. Қазақ тили вә әдәбияти пәниниң муәллими Мерванәм Һәмраеваниң ейтишичә, у интайин тиришчан, идрәклик вә тәртиплик бала. 
– Наильниң билимгә дегән интилиши зор. Муәллимни диққәт билән тиңшашни билиду. Өй тапшурмилирини өз вақтида вә сүпәтлик орунлайду. Тутқан китап вә дәптәрлири адәмниң зоқини кәлтүриду. Наһайити таза вә чирайлиқ язиду. Шуңлашқиму униңға «Балиларға беғишланған конкурслар болуп қалса, сени қатнаштуримән. иккимиз чоқум Астанаға баримиз» дәп вәдә бәргән едим. Хулләс, оқуғучимиз иккимизниң армини әмәлгә ешип, бийил Астанаға берип, униң мукапитини елип қайттуқ. Һәр иккилимиз арминимизға йәттуқ. Сәпәрдин чоңқур тәсиратлар билән қайтқан Наиль «Буниңдин кейин техиму яхши оқуймән» дәп вәдә бәрди, – дәйду Мерванәм һәдә һаяҗанлиниш илкидә. 
Наиль башланғучтин оттура синипқа көчкәндә, муәллими оқуғучисиниң язған эсселирини ҖУЭМ йенидики Анилар кеңишиниң рәиси Зорәм Авутованиң «YouTube» видеохостингидики «Ana tilim – dana tilim» лайиһәсидә елан қилинған конкурсиға қатнаштурди. Нәтиҗидә Наильниң «Қазақ тілі — байлығым» эссеси жуқури баһаға егә болди. Өткән жилниң сентябрь ейида Наиль ҚҖ Маарип министрлиги «Дарын» җумһурийәтлик илмий-тәҗрибә мәркизиниң «Тіл – тәуелсіздік тұғыры» олимпиадисида мукапатлиқ орундин көрүнди. Наильға чоң утуқ елип кәлгән «BILIM-ÒRKENIETI» Миллий инновациялик илмий-тәтқиқат мәркизи тәрипидин Дөләт рәһбири Қасым-Жомарт Тоқаевниң «Тәуелсіздік бәрінен қымбат» намлиқ программилиқ мақалисини яш әвлат арисида кәң тәрғибат қилиш вә патриотлиқ сезимлирини ашуруш мәхситидә уюштурулған «Тәуелсіздік дарыны» намлиқ байқаш болди. Униңға һәртәрәплимә тәйярлиқ билән қатнашқан қабилийәтлик бала ғалиплар сепидин көрүнди. Бу қетим у биринчи орунға егә болуп, І дәриҗилик диплом вә «Тәуелсіздік дарыны» бәлгүси билән мукапатланди. 

Әмгәкчиқазақ наһийәси