• Һасан-һүсән
• 11 Қаңтар, 2024

Билимлик әвлатни йетилдүрүшкә қадир

Бүгүн биз сөз қилмақчи болуватқан Түгмән оттура мәктиви узун жиллиқ тарихқа егә. Униң һазирқи бенаси 1992-жили пайдилинишқа берилгән екән. Мәзкүр билим дәргаһида бүгүнки күндә 37 муәллим 214 оқуғучиниң билим тәшналиғини қандуруп кәлмәктә. Мәзкүр билим дәргаһида 39 әлачи, 90 зәрбидар оқуғучи бар. Улар мәктәп ичидә вә наһийә даирисидә өткүзүлидиған конкурс-байқашларға паал қатнишиватиду. Уларниң оқушқа болған қизиқиши күндин-күнгә улғийип, билим дәриҗисиниң өсүватқанлиғини вә мәктәптики билим бериш системисиниң оқуғучиларни қанаәтләндүридиғанлиғини ениқ байқашқа болиду. Мәктәптә ишләватқан муәллимләр тәркивигиму алаһидә тохтилип өтүшкә әрзийду. 4 муәллим – алий, 29и биринчи дәриҗилик педагоглар. Муәллимләр арисида Қазақстандики Назарбаев әқлий мәктәплири, Англияниң Кембридж университети билән һәмкарлиқта Қазақстанниң билим бериш саһасини йеңи йөнилиштә тәрәққий өткүзүш программисиға етиварән дәриҗилик курслардин өтүп, нәтиҗидә 4 муәллим – І дәриҗилик, 2 муәллим – ІІ дәриҗилик, 1 муәллим ІІІ дәриҗилик курс сертификатлириға егә болди. Умумән, билим дәргаһиниң барлиқ муәллимлири толуқ билим бериш мәзмунини йеңилаш даирисидә пәнләр бойичә педагог хадимларниң билимини ашуруш курслиридин өтүп болди. Мәзкүр программилар асасида оқуғучиларниң функционаллиқ саватини, тәнқидий ойлаш иқтидарини ашурушқа алаһидә көңүл бөлүп, һәрхил интерактив усулларни дәристә маһирлиқ билән пайдилинип, критериаллиқ баһалашни әмәлгә ашуруватиду. Мошу нәтиҗиләргә қарап, муәллимләрниң билим дәриҗисини, мәктәптики оқутуш сүпитини яхши, дәп ейтишқа болиду.
Үлгилик вә тәҗрибилик муәллимләр қатари жилдин-жилға көпәймәктә. Мәктивимиздә рәқәмлик савати үстүн, йеңичә билим беридиған муәллимләр көпчиликни тәшкил қилиду. Мәктивимизниң һәммә кабинетлири заманивий интерактивлиқ тахтилар билән җабдуқланған. Қазақ тили, уйғур тили, химия, физика кабинетлирида һәр дәристә Интернет ториға удул қошулуп, йеңи платформилар билән ишләймиз. Муәллимләр дәрисләрдә Plickers, Flippity программисини, шундақла LearningАpps, Wordwall, TopIQ электронлуқ дәрисликләр платформилирини қоллиниш арқилиқ дәрисләрни қизиқарлиқ өткүзиду. Балилар уларда өзлириниң активлиғини көрситип, яхши баһа елишқа тиришиду. Умумән, дәрисләр яхши өтүлсә, оқуғучиларниң билим елишқа болған қизиқиши ашиду һәм билим сүпитиму көтирилиду. Муәллимләр һәрбир дәрискә пухта тәйярлиқлар билән келип, уни мәзмунлуқ өткүзүшкә мәнпийәтдар. Шу түпәйли уларниң шагиртлириниң билим елишқа болған қизиқиши үстүн, дәп ейтишқа толуқ асас бар. Шагиртлириму устазлирини йәргә қаритиватқини йоқ. Жуқарқи синипларда тәһсил көрүватқан оқуғучилар пәнләр бойичә өткүзүлүп туридиған наһийәлик, вилайәтлик көрүкләрдә алдинқи орунларни егилимәктә. Бу, әлвәттә, оқуғучиларниң билим дәриҗисиниң өсүватқанлиғини көрситиду. Спорт билән шуғуллиниватқан оқуғучилар һәрхил мусабиқиләргә қатнишип, мәктәп шәнини қоғдаватиду. Мәктәптә тәшкил қилинған уссулчилар топиму нурғунлиған оқуғучиларниң қизиқишини қанаәтләндүрүпла қалмай, уларниң жуқури бәдиий эстетикилиқ роһта тәрбийилинишигә, миллий ғуруриниң үстүн болушиға түрткә болуватиду. 

Меһрибан МИРЗАЛИМОВА, 
Түгмән уйғур оттура мәктивиниң 9-синип оқуғучиси