• Спорт
• 25 Қаңтар, 2024

«Шагиртим – пәхрим»

Қазақстанға хизмәт көрсәткән мәшиқләндүргүчи Илияс Анайәтов билән тәсадипи учришип қалдим. Кәйпияти үстүн. 
Мәшүр САСИҚОВ,
«Uiğur avazi»

– Яхши хәвәр барму? – дедим униңға.
– Хуш хәвәр, ука. Шагиртим Мурат Молотов түнүгүн вилайәтлик чемпионатта биринчи орунға еришти, – деди у.
– Тәбрикләймән.
Бу яқ узун жиллар бойи көплигән чемпионларни тәйярлиди. Униң тоғрилиқ бизму бирнәччә мәртә яздуқ. Әмгиги барни әл-жут билгини яхшиғу. Мана әнди Мурат исимлиқ шагирти устазиниң еқидисини йәрдә қоймапту. У 20-қәһритан күни Әмгәкчиқазақ наһийәси Ишиктә шәһиридә грек-рим күриши бойичә 2007–2008-жиллар туғулған өсмүрләр арисида өткән чемпионатта 48 кг.  салмақ дәриҗисидә утуққа йетипту.
Илияс Анайәтовниң шагиртлиридин көпчилиги униң әҗригә хиянәт қилғини йоқ. Барлиғи дегидәк алдинқи орунлардин көрүнүп келиватиду. Һәтта хәлиқара чемпионатларда елимизниң шан-шөһритини қоғдаватқанларму бар. Мәсилән, Қорлан вә Бағлан Жаханша исимлиқ спортчилиримиз шулар җүмлисидин. Мәшиқләндүргүчиниң ейтишичә, Мурат Молотов шуларниң изини бесишқа интиливатқанларниң бири. У өткән жили бирқатар турнир-чемпионатларда утуққа йетип, Қазақстан спорт маһирлиғиға намзат аталди. Һазир норуз ейида өтидиған җумһурийәтлик чемпионатқа тәйярлиниватиду. 
Тәҗрибилик мәшиқләндүргүчи тоғрилиқ сөз қилғанда, униң бу саһада жүргинигә йерим әсиргә тақап қалғанлиғиниму атап өткән орунлуқ. Шу жиллар мабайнида көплигән шагиртларни тәрбийилигән болса, һазирму униңдин зериккини йоқ. Әксичә, булту өз өйидә спорт мәктивини ечип, ишини техиму җанландурди. Бүгүнки күндә у йәрдә әллик-атмиш өсмүр мәшиқлиниватиду. Шундақла Илияс ака – бу бенаниң қурулушиға шәхсий хираҗитини хәшлигәнләрниң бири. Әлвәттә, шагиртлириму қарап турғини йоқ. Қолидин кәлгән ярдимини қилди. Һә, әндиликтә болса, заманивий залда Талғир наһийәсиниң Туздыбастав, Бесағаш вә мошу әтрапқа йеқин йезиларниң балилири грек-рим күришиниң қир-сирини үгиниватиду.