• Шеирлар
• 16 Наурыз, 2024

Яққин ямғур...

Меһригүл Абдуқадирова 1993-жили Алмута вилайити Уйғур наһийәсиниң Дардамту йезисида дунияға кәлгән. 2010-жили Дардамту оттура мәктивини тамамлайду. Шеирийәткә болған иштияқи Уйғур наһийәсиниң Дардамту оттура мәктивидә оқуватқан пәйтлиридила ойғинип, 2006-жилдин башлап шеирлири ана тилимизда нәшир қилинидиған наһийәлик «Или вадиси – Іле өңірі», «Қарадала тынысы – Қарадала нәпәси» гезитлирида йоруқ көрүп келиватиду. Бүгүнки күндә Меһригүл Алмута шәһиридә истиқамәт қилиду. Яш иҗаткарға иҗадий утуқ тилигәч, униң бирнәччә шеирини диққитиңларға һавалә қилимиз.
 

Ана 
Анидәк меһриван тепилмас әсла, 
Аләмни миң чарла, нәччә айланғин.
Анидәк чирайлиқ болмаскән бәрна,
Дуаси билән сән көкләп улғайғин.

Чеһридин көйүми қуяштәк янған,
Нурида яйрайду җимики аләм. 
Ақарған чечиға тәғдир бағланған,
Қәриздар униңдин яралған адәм.

Мәйрими бу күндә есил анамниң,
Соғамни елип мән алдиға барай.
Наваттәк чейини ичип, муңдишип,
Базарда сетилмас меһригә қанай.

Анаң бар, буниңдин ашқан бәхит йоқ,
Тепилмас, сетилмас сөйгүси униң.
Сениңдин башқини сәндәк көрәлмәс,
Сән күлсәң җан-тени күлгүси униң.

Баһарда яққан ямғур 
Алаһидә таза һид билән, 
Муңланған шу дилни жуйисән.
Назук сезим берип сән дилға,
Сөйгү толған нуриң қуйисән.

Һәҗәп башқа баһарда ямғур,
Өзгичә бир сехиргә толған.
Худди қайта өмүр бәргәндәк,
Яшнитиду дилларни солған.

Тоймай сәндин нәпәс алимән,
Шунчә таза, шунчилик шерин.
Яққин ямғур, яғивәр йәнә,
Тазилиқни сезинсун җеним.

Ата
Мени дәп өмрини бәйгигә тиккән,
Әзиз шу җенини түгүчкә түккән. 
Тоғрилаш үчүнзә йолумни мениң,
Дәрдини йошуруп ичигә пүккән.

Дадам бар, дунияда бәхтиярмән мән,
Дадам бар, көрмидим еғирчилиқ, ғәм.
Бәхтимгә бар болғин, аман бол, ата, 
Меһриван, ғәмгүзар анам билән тәң.

Меһригүл Абдуқадирова.