• «Дүгләк үстәл»
• 28 Наурыз, 2024

«Хатириси мәңгү қәлбимиздә»

Өткән шәнбә күни Алмута шәһәрлик «Достлуқ өйидә» Бостандық наһийәлик Уйғур этномәдәнийәт мәркизиниң уюштуруши билән тонулған җәмийәт әрбаби Турғанҗан Розахуновниң ярқин хатирисигә беғишланған «Хатириси мәңгү қәлбимиздә» мавзусида «дүгләк үстәл» өтти. 

Йолдаш МОЛОТОВ, 
«Uiğur avazi»

Униңға Турғанҗан Розахуновниң сәп­дашлири, дост-бурадәрлири, жутдашлири, зиялилар, җәмийәтлик ишларниң активистлири қатнашти. Қошумчә қилиш лазимки, жиғилғанлар дәсләп Достлуқ мәһәл­лисидики Турғанҗан Розахунов дәпин қилинған қәбирстанлиққа кәлди. Бу йәрдә Әвезов наһийәсиниң баш жигитбеши Азат Ибрагимов рәһбәрлигидики жут-җамаәтчилиги вәкил­лири униң роһиға атап қуръан тилавәт қилди. Шундақла, улар, шуларниң ичидә Азтекин Ибрагимов, Қурванҗан Худайбәрдиев вә башқилар Турғанҗан ака һәққидә өзлириниң иллиқ әслимилири билән бөлүшти.
 Андин «дүгләк үстәл» «Достлуқ өйидә» давамлашти. Жиғинни киришмә сөз билән ачқан Бостандық наһийәлик Уйғур этномәдәнийәт мәркизиниң рәиси Карлин Мәхпиров униң мәхсити билән тонуштурди.
— Һәрқандақ хәлиқниң тарихида өчмәс из қалдурған, миллити үчүн нурғун әмгәк қилған шәхсләр болиду, — деди Карлин Нурдуноғли. — Уйғурларму униңдин истисна әмәс. Әйнә шундақ шәхсләрниң бири, тонулған җәмийәт әрбаби Турғанҗан Розахунов десәм, мубалиғә болмас. У өзиниң пидакаранә әмгиги, актив җәмийәтлик паалийити билән маһир тәшкилатчи сүпитидә миллитимизниң мәдәнийитини, сәнъи­тини, маарипини сақ­лап, тәрәққий әткүзүшкә, елимиздә турақлиқ, милләтләрара разимәнликни тәмин­ләштә нурғун ишларни әмәлгә ашурди. Бизниң мәхситимиз вә вәзипимиз әйнә шундақ шәхсләрниң һаятини, әмгәк паалийитини тәшвиқ қилиш, яш әвлатқа үлгә сүпитидә тонуштуруш.
 Шуниңдин кейин жиғилғанлар диққитигә Турғанҗан Розахунов һәққидә чүширилгән һөҗҗәтлик фильмдин үзүндә һавалә қилинди. Өз новитидә сөз алған Алмута шәһәрлик Уйғур этномәдәнийәт мәркизиниң рәиси Һосманҗан Обулов, ҖУЭМниң Алмута шәһәрлик шөбисиниң рәиси Әбәйдуллам Җаппаров, Алмута шәһәрлик Жигитбашлири иттипақиниң рәиси Махмутҗан Мәңсүров жиғинниң әһмийитини тәкитләп, «дүгләк үстәл» ишиға утуқ тилиди. Андин Турғанҗан Розахунов билән биллә ишлигән сәпдашлири география пәнлириниң доктори, профессор Шерипҗан Надиров, Галина Молчанова, Сүлфи Мәшрәпов, Роза Абубәкриева, Һүсән Еләмов, Октябрь Қурбанниязов, һәдиси Зоя Розахунова вә башқилар у тоғрилиқ өзлириниң әслимилирини, униң әмгигини, қолға кәлтүргән утуқлири һәққидә тәпсилий ейтип бәрди. Жиғин ахирида сөз алған Турғанҗан Розахуновниң рәпиқиси Һавагүл Розахунова мошу «дүгләк үстәлни» уюштурған һәм униңға паал қатнашқан барлиқ шәхсләргә аилиси намидин тәшәккүр изһар қилди.