• «Дүгләк үстәл»
• 25 Сәуір, 2024

Китап вә китапхан

Түнүгүн Алмута шәһиридики С. Бегалин намидики мәркизий балилар китапханисида Хәлиқара китап күнигә беғишланған «дүгләк үстәл» болуп өтти. 

Мәшүр САСИҚОВ,
«Uiğur avazi»

Китапхана мәмурийитиниң тәшәббуси билән уюштурулған чарә-тәдбиргә М.Әвезов Әдәбият вә сәнъәт институтиниң доценти, театршунас Аманкелди Муқан, А.Байтурсынұлы намидики Тил билими институтиниң илмий хадимлири Әдилет Ахмет, Қуатбек Дүйсен, С.Байжанов намидики 162-мәктәп-гимназияниң китапхана йетәкчиси Света Далибаева, Алмута алий медицина колледжиниң китапханичиси Алия Тайшибекова вә җумһурийәтлик эстрада вә цирк колледжи студентлири билән Ч.Вәлиханов намидики 12-ихтисаслаштурулған гимназия оқуғучилири қатнашти.
-Елимиз Президенти Қасым-Жомарт Тоқаев Түркстан шәһиридә өткән қурултайда әйни жилларда елимиздә китапханиға йетәрлик дәриҗидә көңүл бөлүнмигәнликтин китап фондиниң апчирап кәткәнлигини тилға алди. Аһали арисида китап оқушқа болған қизиқиш йоқап, яш әвлат вәкиллири тарихимиз билән әдәбиятимиздин бехәвәр қалғанлиғи раст. Һазир китапхана вә у йәрдә әмгәк қиливатқан хадимларниң шараитини яхшилаш қолға елинди. Һәтта күн тәртивидә елимиздә тәвлүк бойи ишләйдиған китапханилар қәд көтириш мәсилиси туриду.
Президентниң мошу пикрини шиар қилған «дүгләк үстәл» қатнашқучилири, асасән, китап мавзу әтрапида сөз қилип, униң пайдиси вә әдәбиятимиз билән тарихимизни оқуп үгинишимиздә муһим роль атқуридиғанлиғини тәкитләшти. Болупму бүгүнкидәк Интернет тәрәққияти заманида китаптин алған билимниң орни алаһидә екәнлигини тилға алди. Андин китапханичилар өзлири әмгәк қиливатқан иш орниниң паалийитидин учур бәргәч, оқуғучилар билән студентлар арисида соал-җавап уюштурди. Хошал қиларлиғи, уларниң көпчилиги китапни көп оқуйдиған болуп, шу йәрдила оқуған китаплиридин алған тәсиратлири билән бөлүшти. Буниңдин сирт, «дүгләк үстәл» қатнашқучилиридин җумһурийәтлик эстрада вә цирк колледжиниң студентлири Талшын Қынтаева билән Таңжарық Әлдибай қазақ хәлқиниң нахша-сазлиридин чачқа чачти.
Мәрасим ахирида А.Байтурсынұлы намидики Тил билими институтиниң илмий хадимлири Әдилет Ахмет, Қуатбек Дүйсен Бегалин намидики балилар китапханисиға елип кәлгән бирнәччә китапниң рәмзлик лентиси қийди.